भक्तपुर । श्रीलंकामा जारी ९ औं संस्करणको एसीसी महिला टि–२० एसिया कपको उपाधिका लागि भारत र श्रीलंका भिड्ने भएका छन् ।
भारत साविक विजेता र श्रीलंका साविक उपविजेता टोलीसमेत हुन् ।
शुक्रवार भएको पहिलो सेमिफाइनल खेलमा भारतले बंगलादेशमाथि १० विकेटको जित हासिल गर्दै र दोस्रो सेमिफाइनल खेलमा श्रीलंकाले पाकिस्तानलाई ३ विकेटले पराजित गर्दै फाइनल यात्रा तय गरेका हुन् ।
जारी प्रतियोगितामा भारत र श्रीलंका अपराजित टोली हुन् ।
त्यसअघि समूह चरणमा भारतले समूह ‘ए’ मा शतप्रतिशत जित निकालेको थियो ।
भारतले समूह चरणमा पाकिस्तानमाथि ७ विकेट, युएईमाथि ७८ रन र नेपालमाथि ८२ रनको जित निकालेको थियो ।
यता, श्रीलंका पनि समूह ‘बी’ मा अपराजित रर्यो ।
श्रीलंकाले समूह चरणमा बंगलादेशलाई ७ विकेट, मलेसियालाई १४४ रन र थाइल्याण्डमाथि १० विकेटको जित निकालेको थियो ।
एसियाकैै महारथी टोली भारतले अहिलेसम्म ८ मध्ये सर्वाधिक ७ पटक एसिया कपको उपाधि जितेको छ ।
सन् २०१८ को प्रतियोगिता भने बंगलादेशले जितेको थियो ।
उक्त संस्करणमा बंगलादेशले भारतलाई फाइनलमा ३ विकेटले पराजित गरेको थियो ।
श्रीलंकाले अहिलेसम्म एसिया कप जित्न सकेको छैन ।
तर, श्रीलंकाले अहिलेसम्म पाँचपल्ट एसिया कपमा फाइनल खेलिसकेको छ ।
९ औं संस्करणको फाइनल खेल आईतवार दिउँसो नेपाली समयअनुसार सवा ३ बजेदेखि सुरु हुने तालिका रहेको छ ।
लेखक
