भक्तपुर । फिफा विश्वकपअन्तर्गत मंगलवारबाट समूह चरणका अन्तिम लिग खेलहरु सञ्चालन हुँदैछन् ।
आज समूह ‘ए’ र ‘बी’ का चार खेल कतारका विभिन्न रंगशालामा हुँदैछन् । समूह चरणका अन्तिम खेल निर्णायक हुने भएकोले प्रत्येक समूहको खेल एउटै समयमा हुनेछ ।
आज हुने समूह ‘ए’ का खेल नेपाली समयअनुसार बेलुकी पौने ९ बजे हुँदैछ भने राति पौने १ बजे समूह ‘बी’ का खेलहरु हुनेछन् ।
इक्वेडरविरुद्व सेनेगल
जारी विश्वकपको समूह ‘ए’ मा रहेको यी दुई टोली आज आमनेसामने हुँदैछन् । यसअघि समूह चरणका दुई खेलमा एकमा जित अर्कोमा बराबरी नतिजा हासिल गरेको इक्वेडरको तालिकामा चार अंक रहेको छ ।
सेनेगलसंग आज बराबरीको नतिजा नै उत्तर अमेरिकी राष्ट्र इक्वेडरलाई विश्वकपको दोस्रो चरण पुग्न पर्याप्त हुनेछ ।
उता अफ्रिकी राष्ट्र सेनेगललाई भने आज निश्चित जित नै चाहिने छ । यदि आज इक्वेडरसंग पराजित या बराबर भए सेनेगल प्रतियोगिताबाट बाहिरिने छ ।
सेनेगलको दुई खेलमा एकमा मिश्रित नतिजा छ । उसले एक खेलमा जित र अर्कोमा हार बेहोरेको छ । उसको अंक तालिकामा ३ अंक छ । खालिफा अन्तराष्ट्रिय रंगशालामा यो खेल हुनेछ ।
नेडरल्याण्डविरुद्व कतार
युरोपली राष्ट्र नेडरल्याण्डले आयोजक कतारसंग समूह चरणको अन्तिम खेल अल ब्याट रंगशालामा खेल्दैछ ।
एक खेलमा जित र अर्कोमा बराबरी नतिजा आत्मसात गरेको युरोपेली राष्ट्रले आज जितकै लागि खेल्ने निश्चित छ ।
यदि आज कतारविरुद्व जित हात पार्न सके डच टोली समूह विजेताका रुपमा दोस्रो चरण प्रवेश गर्नेछ ।
बराबरी भएको अवस्थामा पनि दोस्रो चरणमा त स्थान बनाउन सकिनेछ तर समूह विजेता बन्न बराबरी नतिजाले अरुमा भर पर्नुपने हुन्छ ।
यता एसियाली राष्ट्र कतार भने यसअघि नै प्रतियोगिताबाट बाहिरिसकेको छ । आजको खेल अरेबी राष्ट्रका लागि प्रतिष्ठाको खेल हुनेछ ।
इरानविरुद्व अमेरिका
जारी विश्वकपमा मिश्रित नतिजा आत्मसाथ गरेको इरानले एक खेलमा जित र अर्कोमा हारको नतिजा बेहोरेको छ ।
पहिलो खेलमा इंग्ल्याण्डविरुद्व ६–२ को फराकिलो हार बेहोरेको एसियाली इस्लामिक राज्यले दोस्रो खेलमा वेल्समाथि रोमाञ्चक २–० को जित हात पारेको थियो ।
यता अमेरिकाले भने जारी प्रतियोगितामा दुबै खेल बरारबरी खेलेको थियो । समूह ‘बी’ मा रहेको इरानले अमेरिकामाथि जित हात पारे दोस्रो चरणको स्थान सुरक्षित गर्नेछ ।
त्यस्तै, उसले बराबरीको नतिजा ल्याएता पनि दोस्रो चरण पुग्ने सम्भावना भने रहन्छ । यता अमेरिकालाई भने दोस्रो चरण प्रवेशको लागि इरानमाथि निश्चित जित नै चाहिनेछ । यो खेल अल थुमामा रंगशालामा हुनेछ ।
वेल्सविरुद्व इंग्ल्याण्ड
समूह ‘बी’ को .डर्बी खेलमा आज वेल्स र इंग्ल्याण्ड विश्वकपको समूह चरणको अन्तिम खेलमा आमनेसामने हुँदैछन् ।
संयुक्त अधिराज्य बेलायतका यी अंगका रुपमा रहेका यी दुई राष्ट्रको खेल रोमाञ्चक हुने अपेक्षा गर्न सकिन्छ ।
ग्यारेथ साउथगेटको टोली इंग्ल्याण्ड वेल्समाथि सहज जित निकाल्दै समूह विजेताका रुपमा अन्तिम १६ मा प्रवेश गर्ने दाउमा हुनेछ । इंग्लिस टोलीले दुई खेलमा चार अंक जोडेको छ ।
उता समूहको पुछारमा रहेको टोली वेल्स पनि चिरिपरिचित टोलीविरुद्व आश्चर्यजनक नतिजा निकाल्दै दोस्रो चरण पुग्ने प्रयासमा हुनेछ । यो खेल अहम्मद विन अली रंगशालामा हुनेछ ।
लेखक
