एजेन्सी । लाजियोसंग हारका बाबजुद युभेन्टस इटालियन घरेलु फुटबलको लोकप्रिय प्रतियोगिता कोपा इटालियाको फाइनलमा प्रवेश गरेको छ ।
मंगलवार राति भएको सेमिफाइनलअन्तर्गत दोस्रो लेग खेलमा लाजियोसंग २–१ को हारका बाबजुद समग्रमा ३–२ को जितका साथ युभेन्टस कोपा इटालियाको फाइनलमा प्रवेश गरेको हो ।
त्यसअघि सेमिफाइनलअन्तर्गत पहिलो लेग खेलमा युभेन्टस २–० ले विजयी भएको थियो ।
लाजियोको घरेलु मैदान ओलम्पिको रंगशालामा भएको खेलमा घरेलु टोलीका लागि भालेन्टिन कास्टेल्लानोसले दुई गोल गर्दा भ्रमणकारी टोलीका लागि एरिक मिलिकले एक गोल गरे ।
खेल सुरु भएको १२ औं मिनेटमा लुइस अबर्टोको पासमा कास्टेल्लानोसले गोल गर्दा लाजियो १–० ले अघि बढ्दा समग्रमा २–१ को अवस्थामा आयो ।
त्यसपछि दोस्रो हाफको ४८ औं मिनेटमा अबर्टोकै पासमा कास्टेल्लानोसले गोल थप्दा लाजियो २–० समग्रमा २–२ को बराबरीमा आयो ।
तर, ८३ औं मिनेटमा एरिकले गोल फर्काउँदा खेल २–१ को अवस्थामा आउँदा समग्रमा युभेन्टस ३–२ ले अघि बढ्यो ।
त्यसपछि खेलमा थप गोल ननिस्केपछि खेल २–१ ले युभेन्टसले हारेतापनि समग्रमा ३–२ को जित निकाल्दै फाइनल स्थान सुरक्षित गर्न सफल भयो ।
योसंगै युभेन्टसले उपाधिका लागि एट्लान्टा र फियोरेन्टिनाबीचको विजेतासंग फाइनलमा प्रतिस्पर्धा गर्ने भएको छ ।
लेखक
