एजेन्सी । फ्रान्सेली महारथी पेरिस सेन्ट जर्मन (पिएसजी) युरोपेली क्लब फुटबलको शीर्ष प्रतियोगिता युईएफए च्याम्पियन्स लिगको सेमिफाइन प्रवेश गरेको छ ।
मंगलवार राति भएको क्वाटरफाइनलअन्तर्गत दोस्रो लेग खेलमा इंग्लिस क्लब एस्टन भिल्लासंग ३–२ गोल अन्तरले पराजित भएपनि समग्रमा ५–४ को जितका साथ पिएसजी सेमिफाइनलमा प्रवेश गरेको हो ।
त्यसअघि पिएसजीले क्वाटरफाइनलअन्तर्गत पहिलो लेग खेलमा ३–१ को जित निकालेको थियो ।
इंग्लिस क्लबको घरेलु मैदान भिल्ला पार्क रंगशालामा भएको खेलमा बलियो पिएसजीमाथि जित निकाले तापनि घरेलु टोली अन्तिम चारमा भने प्रवेश गर्न असफल रह्यो ।
खेल सुरु भएको ११ औं मिनेटमा आर्चफ हाकिमीले गोल गर्दै भ्रमणकारी टोलीलाई १–० समग्रमा ४–१ ले अघि बढाए ।
त्यस्तै, २७ औं मिनेटमा ओसमाने डेम्बेलेको पासमा नुनो मेन्डिसले गोल गर्दा पिएसजी २–० समग्रमा ५–१ ले अघि बढ्यो ।
तर, ३४ औं मिनेटमा जोन म्याकगिनको पासमा यौरी टेलिस्म्यानले घरेलु टोलीका लागि गोल फर्काउँदा खेल २–१ समग्रमा ५–२ को अवस्थामा आयो ।
त्यस्तैगरी, दोस्रो हाफको ५५ औं मिनेटमा पाउ टोरेसको पासमा जोन म्याकगिनले गोल गर्दा एस्टन भिल्ला २–२ समग्रमा ५–३ को अवस्थामा आयो ।
यता, ५७ औं मिनेटमा मार्कुस रासफोर्डको पासमा एज्री कोन्साले गोल गर्दा भिल्ला ३–२ समग्रमा ४–५ को अवस्थामा आयो ।
त्यसपछि खेलमा थप गोल भएन र हारका बाबजुद पनि पिएसजी समग्रमा जित रच्न सफल भयो ।
लेखक
