भक्तपुर । नेपालले हङकङ सिक्सेसमा इंग्ल्याण्डमाथि सनसनी जित रचेको छ ।
शुक्रवार विहान भएको खेलमा नेपालले बलियो इंग्ल्याण्डमाथि ६ विकेटको सनसनी जित रहेको हो ।
योसंगै समूह ‘बी’ मा रहेको नेपालले समूह तालिकामा महत्वपूर्ण २ अंक जोडेको छ ।
हङकङको मङकङस्थित मिसन रोड ग्राउण्डमा भएको खेलमा ९८ रनको विजयी लक्ष्यका साथ जवाफी ब्याटिङमा उत्रिएको नेपालले ४.२ ओभरमा विना विकेट क्षति ९९ रन जोड्यो ।
नेपाललाई जिताउन कप्तान सुन्दिप जोराले १२ बलमा ३ चौका र ६ छक्का प्रहार गर्दै ५० रनको अर्धशतकिय पारी खेल्दा राशिद खानले ५ बल खेल्नेक्रममा २ चौका र २ छक्का प्रहार गर्दै २१ रन जोडेर अविजित रहे ।
त्यस्तै, लोकेश बमले ११ बलमा १ चौका र २ छक्का प्रहार गर्दै २० रन जोडेर अविजित रहे ।
नेपालले अतिरिक्त रुपमा ८ रन जोड्यो ।
इंग्ल्याण्डले नेपालको कुनैपनि विकेट लिन सकेन ।
त्यसअघि टस जितेको नेपालले इंग्ल्याण्डलाई पहिला ब्याटिङमा निम्त्यायो ।
पुर्व विजेता समेत रहेको इंग्ल्याण्डले ५.५ ओभरमा अलआउट हुँदै ९७ रन जोड्यो ।
थ्री लायन्सका रुपमा समेत चिनिने इंग्ल्याण्डका लागि कप्तान रबि बोपाराले १२ बलमा १ चौका र ७ छक्का प्रहार गर्दै ४९ रन जोडेर आउट हुँदा समित पटेलले १७ बल खेल्नेक्रममा ३ चौका र ३ छक्का प्रहार गर्दै ३९ रन जोडेर पेविलियन फर्किए ।
त्यस्तै, इड बर्नार्डले ५ तथा जेम्स कोल्सले १ रन जोडेर आउट हुँदा एलेक्स डाभिस र जोर्डन थोम्पसन शुन्य रनमा पेविलियन फर्किए ।
इंग्ल्याण्डले अतिरिक्त रुपमा ३ रन जोड्यो ।
बलियो इंग्ल्याण्डलाई अलआउट गर्न नेपालका लागि प्रतिश जिसीले २ ओभर बलिङ गर्नेक्रममा १८ रन दिएर ३ विकेट लिँदा नारायण जोशी, लोकेश बम र विवेक यादवले समान १–१ विकेट लिए ।
अब नेपालले प्रतियोगिताअन्तर्गत दोस्रो खेल सनिवार अष्ट्रेलियासंग खेल्नेछ ।
लेखक
