एजेन्सी । घरेलु टोली हङकङलाई पराजित गर्दै पपुवा न्युगिनी (पिएनजी) हङकङ टि–२० आई सिरिज फ्रेन्डसिप कपको फाइनलमा प्रवेश गरेको छ ।
मंगलवार भएको दोस्रो खेलमा पपुवा न्युगिनीले हङकङलाई १० विकेटले पराजित गर्दै त्रिदेशिय सिरिजको फाइनलमा स्थान बनाएको हो ।
योसंगै फाइनलमा उपाधिका लागि नेपाल र पिएनजी प्रतिस्पर्धा गर्ने पक्का भएको छ ।
त्यसअघि मंगलवार नै भएको पहिलो खेलमा नेपालले पिएनजीमाथि ८५ रनको जित निकाल्दै फाइनलमा स्थान पक्का गरेको थियो ।
हङकङको टिन कोङ रोड रिक्रिएसन ग्राउन्डमा भएको दोस्रो खेलमा १२२ रनको समान्य विजयी लक्ष्यका साथ जवाफी ब्याटिङमा उत्रिएको पिएनजीले १२.४ ओभरमा विना विकेट क्षति १२४ रन जोड्दै सहज जित निकाल्यो ।
पिएनजीको जितमा सेसे बाउले ४३ बल खेल्नेक्रममा ६ चौका र १ छक्का प्रहार गर्दै सर्वाधिक ६१ रनको अर्धशतकिय पारी खेल्दै अविजित रहँदा टोनी उराले ३३ बलमा ५ चौका र २ छक्का प्रहार गर्दै ५१ रनको अर्धशतकिय पारी खेल्दै अविजित रहे ।
पिएनजीले अतिरिक्त रुपमा १२ रन जोड्यो ।
त्यसअघि टस जितेर पहिला ब्याटिङमा उत्रिएको घरेलु टोलीले १८.३ ओभरमा अलआउट हुँदै १२१ रन जोड्यो ।
हङकङका लागि विकेटकिपर जिशान अलीले २९ बलमा १ चौका र ६ छक्का प्रहार गर्दै ५५ रनको अर्धशतकिय पारी खेल्दा नस्रुल्ला राणाले १६ बल खेल्दै २ चौका र १ छक्का प्रहार गर्दै १६ रन जोडेर पेविलियन फर्किए ।
त्यस्तै, इशान खानले १६ बलमा १ छक्का प्रहार गर्दै १६ रन जोडेर पेविलियन फर्किदा बाबर हायाटले १५ बल खेल्नेक्रममा १ छक्का प्रहार गर्दै १२ रन जोडेर रनआउट भए ।
यता, यासिम मुर्टाजा ८, मार्टिन कोएट्जी ३, कप्तान निजाकत खान २ र अन्शुमन रथ १ रनमा पेविलियन फर्किदा हङकङका अन्य ३ खेलाडी शुन्य रनमा पेविलियन फर्किए ।
हङकङले अतिरिक्त रुपमा ८ रन जोड्यो ।
घरेलु टोलीलाई सस्तैमा अलआउट गर्न पिएनजीका लागि कप्तान अस्सद भाला, काबुआ मारेया, अलेइ नाओ र सेसे बाउले समान २–२ विकेट लिए ।
सिरिजअन्तर्गत फाइनल खेल बुधवार हुनेछ ।
लेखक
