एजेन्सी । भारतमा जारी १५ औं संस्करणको एफआईएच हक्की विश्वकपअन्तर्गत स्पेनले मलेसियामाथि पेनाल्टी सुटआउटमा जित हात पार्दै क्वाटरफाइनलमा प्रवेश गरेको छ ।
निर्धारित र अतिरिक्त समय २–२ गोलको बराबरीमा खेल सकिएसंगै खेलको निर्णय सुटआउटमार्फत भएको थियो । जसमा स्पेन ४–३ ले विजयी हुँदै हक्की विश्वकपको क्पाटरफाइनल प्रवेश गरेको हो ।
सुटआउटमा स्पेनका लागि मिरालेस मार्क, जसप्रित जाभियर, बोनास्ट्रे जोर्डी र मिरालेस मार्सले गोल गरे । यता, पराजित टोलीका लागि शाह्मे इरफान सुहाइमी, सारी फैजल र आसरी फिर्हानले गोल गरे ।
त्यसअघि कालिङ्गा रंगशाला भुवनेश्वरमा भएको खेलमा दोस्रो क्वाटरसम्मको खेल गोलरहित बराबरीमा सकिएको थियो । तेस्रो क्वाटर ३ गोल हुँदा चौथौं क्वाटरमा एक गोल भयो ।
खेलको ३४ औं मिनेटमा सारी फैजलको गोलमार्फत मलेसियाले १–० को अग्रता लियो । तर, ४० औं मिनेटमा मिरालेस मार्कले गोल गर्दै स्पेनलाई १–१ को बराबरीमा ल्याएको थियो ।
लगत्तै ४१ औं मिनेटमा जसप्रित जाभियरले गोल गर्दा स्पेन खेलमा २–१ ले अगाडी बढेको थियो ।
यता, ४८ औं मिनेटमा मलेसिया खेलमा फर्कियो । सिल्भरियोस शिल्लोले गोल गर्दा खेल २–२ को बराबरीमा सकियो ।
एसियाली राष्ट्र मलेसियालाई पराजित गरेको युरोपेली राष्ट्र स्पेनले अब क्वाटरफाइनलमा हक्कीको विश्व नम्बर १ अस्ट्रेलियासंग प्रतिस्पर्धा गर्नेछ ।
लेखक
