एजेन्सी । भारतमा जारी १५ औं संस्करणको एफआईएच हक्की विश्वकप २०२३ को उपाधि जर्मनीले उचालेको छ ।
आइतवार राति भएको उपाधि भिडन्तमा साविक विजेता बेल्जियमलाई सुटआउटमा पराजित गर्दै उपाधि जितेको हो ।
योसंगै जर्मनीले तेस्रो पटक हक्की विश्वकप जितेको छ । यसअघि सन् २००६ र २०१० मा जर्मनीले हक्की विश्वकपको उपाधि जितेको थियो ।
भुवनेश्वरस्थित बिर्सा मुन्द अन्तराष्ट्रिय हक्की रंगशालामा भएको फाइनल खेलको निर्धारित समय ३–३ को बराबरी भएपछि खेलको निर्णय सुटआउटमार्फत भएको थियो । जँहा जर्मनी ५–४ ले विजयी रह्यो ।
जर्मनीका लागि प्रिन्ज थिनेसले र विलियन निकलासले २–२ तथा मुलर हान्नेसले १–१ गोल गरे । ग्रामबुस्च म्याट्स र मिट्काउ मार्कोको प्रहार खेर गयो ।
यता, बेल्जियमका लागि भान अबुइल फ्लोरेन्टले दुई गोल गर्दा किना एन्टोइन, कोसयन्स ताङ्गाइले गोल गर्दा वेग्नेज भिक्टर, दि स्लोभेर अर्थुर र भान अबुइल फ्लोरेन्टको एक प्रहार चुक्न पुग्यो ।
त्यसअघि निर्धारित समयको खेलमा ९ औं मिनेटमा फ्लोरेन्टको गोलमार्फत बेल्जियमले सुरुवाती अग्रता लिएको थियो ।
लगत्तै १० औं मिनेटमा कोसयन्स ताङ्गाइले गोल थप्दा बेल्जियम २–० ले अघि बढेको थियो ।
पहिलो क्वाटर २–० ले अघि रहेको साविक विजेता बेल्जियमले दोस्रो क्वाटरमा १ गोल बेहोर्यो । जर्मनीका विलियन निकलासले खेलको २८ औं मिनेटमा गोल गर्दा जर्मनी खेलमा फर्कने संकेट गर्यो ।
तेस्रो क्वाटरमा जर्मनीका पइलेट गोन्जालोले गोल गर्दै खेल रोमाञ्चक रुपमा २–२ को बराबरीमा आयो ।
त्यसपछि चौथौं तथा अन्तिम क्वाटरको ४७ औं मिनेटमा ग्रामबुस्च म्याट्सले गोल गर्दै जर्मनीलाई खेलमा ३–२ ले अगाडी लग्यो ।
खेल सकिन २ मिनेट अगाडी बेल्जियमले गोल गर्दै खेल बराबरी गर्यो । बेल्जियमका लागि बुन टमले खेलको ५८ औं मिनेटमा गोल गर्दै खेललाई निर्धारित समयमा ३–३ को बराबरीमा ल्याएका थिए ।
लेखक
