भक्तपुर । काठमाडौंमा जारी आईसीसी विश्वकप लिग २ त्रिकोणात्मक सिरिजअन्तर्गत स्कटल्याण्डविरुद्वको खेल नेपालले जितेको छ ।
शुक्रवार भएको खेलमा नेपालले बलियो स्कटल्याण्डलाई ३ विकेटले पराजित गरेको हो ।
२७५ रनको विजयी लक्ष्य पछ्याएको नेपालले ४७ ओभर खेल्दै ७ विकेटको क्षतिमा लक्ष्य पूरा गर्यो ।
क्रितिपुरस्थित टियू क्रिकेट मैदानमा नेपालका लागि दिपेन्द्र सिंह ऐरीले ११६ बल खेल्दै ८ चौका र १ छक्का प्रहार गर्दै सर्वाधिक ८५ रन जोडे । ऐरी अविजित रहे ।
त्यस्तै, कुशल मल्लले ६७ बलमा ९ चौका र ४ छक्का मद्दतमा ८१ रन जोड्दा सोमपाल कामीले ३२ बल खेल्दै ३ चौका प्रहार गर्दै नटआउट २४ रन जोडे ।
गुलशन झाले २८ बलमा १७, कुशल भुर्तेलले ८ बलमा १६, विकेटकिपर आसिफ शेखले १४ बलमा९, कप्तान रोहित पौडेलले ६, सुन्दिप जोरा ५ तथा ज्ञानेन्द्र मल्ल ४ रनमा आउट भए । घरेलु टोलीले अतिरिक्त रुपमा २८ रन पाएको थियो ।
भ्रमणकारी टोलीका लागि क्रिस सोल र मार्क वाटले समान ३–३ विकेट हात पारे ।
त्यसअघि टस हारेर पहिला ब्याटिङमा उत्रिएको स्कटल्याण्डले निर्धारित ५० ओभरको खेलमा ९ विकेट गुमाउँदै २७४ रन बनायो ।
स्कटल्याण्डका लागि माइकल लिस्कले ८५ बलमा ३ चौका र ९ छक्का प्रहार गर्दै अविजित १०७ रनको शतकिय इनिङ्स खेले ।
ज्याक जार्भिसले ३८ बल खेल्दै १ चौका र १ छक्का मद्दतमा २६ रन जोड्दा क्रिस्टोफर म्याक ब्राइडले २९ बलमा ३ चौका प्रहार गर्दै २२ रन जोड्दै पेबिलियन फर्किए ।
त्यस्तै, ब्रान्डन म्याकमुलेन २६ बलको सामना गर्दा १ छक्का प्रहार गर्दै २२ रन बनाउँदा मार्क वाटले ३१ बल खेल्दै १ चौका मद्दतमा २० रन बनाउँदै आउट भए ।
क्रिरिचिइ ब्यारेङटनले २५ बलमा २ चौका र १ छक्का प्रहार गर्दै १९ रन जोड्दा विकेटकिपर टोमस स्कट सबटार म्याकिन्टोसले १९ बल खेल्दै २ चौकाको मद्दतमा १९ रन बनाउँदै आउट भए ।
क्रिस ग्रेभासले २२ बलमा १ चौकामा १६ रन बनाउँदै आउट हुँदा अन्य ब्याट्सम्यानले दोहोरो अंकमा रन बटुल्न सकेनन् । भ्रमणकारी टोलीले १६ रन अतिरिक्त रुपमा पाएको थियो ।
नेपालका लागि सन्दिप लामिछानेले सर्वाधिक ३ विकेट हात पार्दा कुशल मल्लले २ विकेट लिए । त्यस्तै, सोमपाल कामी, कुशल भुर्तेल र दिपेन्द्र सिंह ऐरी १–१ विकेट लिए ।
नेपालले ठूलो लक्ष्य पछ्याएर जितेको यो दोस्रो खेल हो । स्कटल्याण्डविरुद्व प्राप्त जितसंगै जारी सिरिजमा नेपालले लगातार दोस्रो जित निकालेको छ । यसअघि नेपालले नामिबियालाई पराजित गरेको थियो ।
लेखक
