एजेन्सी । उपाधि दाबेदार राष्ट्र अष्ट्रेलियाले आईसीसी टि–२० विश्वकपअन्तर्गत खेलमा स्कटल्याण्डलाई पराजित गरेको छ ।
आईतवार विहान भएको खेलमा बलियो टेस्ट राष्ट्र अष्ट्रेलियाले एसोसियट राष्ट्र स्कटल्याण्डलाई ५ विकेटले पराजित गरेको हो ।
जितसंगै अष्ट्रेलियाले समूह चरणमा शतप्रतिशत नतिजा आफ्नो पक्षमा पार्न सफल भएको छ ।
अष्ट्रेलियाले समूह ‘बी’ मा४ खेलबाट ८ अंक जोड्दै समूह विजेता भएको छ ।
यता, अष्ट्रेलियाले स्कटल्याण्डलाई हराएसंगै इंग्ल्याण्ड पनि समूह उपविजेता बन्दै सुपर ८ मा प्रवेश गर्न सफल भएको छ ।
साविक विजेता टोलीले ४ खेलबाट ५ अंक जोडेको छ ।
उसो त एसोसियट राष्ट्र स्कटल्याण्डको पनि समान ४ खेलमा ५ नै अंक रहेको छ ।
तर, नेट रननेटका आधारमा इंग्ल्याण्ड दोस्रो स्थानमा उक्लिदै अघिल्लो चरणमा प्रवेश गरेको हो ।
वेस्ट इन्डिजस्थित बौसेजोर रंगशालामा भएको खेलमा १८१ रनको विजयी लक्ष्यका साथ जवाफी ब्याटिङमा उत्रिएको अष्ट्रेलियाले १९.४ ओभरमा ५ विकेट गुमाउँदै १८६ रन जोड्यो ।
अष्ट्रेलियाको जितमा ओपनर ब्याट्सम्यान ट्राभिस हेडले ४९ बलमा ५ चौका र ४ छक्का प्रहार गर्दै ६८ रनको अर्धशतकिक पारी खेल्दा मार्कुस स्टोइनिसले २९ बल खेल्दै ९ चौका र २ छक्का प्रहार गर्दै ५९ रनको अर्धशतकिय पारी खेलेर पेविलियन फर्किए ।
त्यस्तै, टिम डेभिडले १४ बलमा ३ चौका र १ छक्का प्रहार गर्दै २८ रन जोडेर अविजित रहँदा ग्लिन म्याक्सवेलले ८ बल खेल्दै १ छक्का प्रहार गरेर ११ रन जोड्दै पेविलियन फर्किए ।
यता, कप्तान मिट्चेल मार्श ८ र अर्का ओपनर डेभिड वार्नर १ रनमा पेविलियन फर्किदा विकेटकिपर म्याथ्यु वाडे ४ रनमा अविजित रहे ।
अष्ट्रेलियाले अतिरिक्त रुपमा ७ रन जोड्यो ।
स्कटल्याण्डका लागि मार्क वाट र सफियान शरिफले समान २–२ विकेट लिँदा ब्राड ह्विलले १ विकेट लिए ।
त्यसअघि टस हारेर पहिला ब्याटिङमा उत्रिएको स्कटल्याण्डले निर्धारित २० ओभरमा ५ विकेट गुमाउँदै १८० रन जोड्यो ।
स्कटल्याण्डका लागि ब्रान्डन म्याकमुल्लेनले ३४ बलमा २ चौका र ६ छक्का प्रहार गर्दै ६० रनको अर्धशतकिय पारी खेल्दा कप्तान रिची बेरिङटनले ३१ बल खेल्दै १ चौका र २ छक्का प्रहार गर्दै ४२ रन जोडेर अविजित रहे ।
त्यस्तै, ओपनर ब्याट्सम्यान जर्ज मुन्सेले २३ बलमा २ चौका र ३ छक्का प्रहार गर्दै ३५ रन जोडेर आउट हुँदा विकेटकिपर म्याथ्यु क्रसले ११ बल खेल्दै १ चौका र १ छक्का प्रहार गर्दै १८ रन जोडेर पेविलियन फर्किए ।
यता, क्रिस ग्रेभ्स ९, माइकल लिस्क ५ र अर्का ओपनर माइकल जोन्स २ रनमा पेविलियन फर्किए ।
स्कटल्याण्डले अतिरिक्त रुपमा ९ रन जोड्यो ।
अष्ट्रेलियाका लागि ग्लिन म्याक्सवेलले ४ ओभर बलिङ गर्दै ४४ रन खर्चिएर २ विकेट लिँदा अस्टोन अगर, नाथान इलिस र एडम जाम्पाले समान १–१ विकेट लिए ।
लेखक
