भक्तपुर । सूर्य नेपाल काठमाडौं ओपन गल्फ प्रतियोगिताको दोस्रो दिन पनि रवि खड्काले अग्रता बनाएका छन् ।
चार अन्डर ६४ स्कोर गरेका रविले समग्रमा १० अन्डर १२६ स्कोर जोडेका थिए । सूर्य नेपाल काठमाडौं ओपनमा रविले पहिलो दिन ६–अन्डर ६२ स्कोर गरेका थिए ।
३६ होलको समाप्तीमा रविले भुवन नगरकोटीलाई एक स्ट्रोकले पछि परेका छन् ।
रोयल नेपाल गल्फ क्लबमा जारी प्रतियोगिताको दोस्रो दिन रविले उत्कृष्ट प्रदर्शनलाई निरन्तरता दिनेक्रममा पहिलो, तेस्रो, चौँथो र छैटौँ होलमा बर्डी प्रहार गरे ।
दोस्रो स्थानमा रहेका भुवनले पनि दोस्रो दिन ४–अन्डर ६४ कार्ड बनाउँदा समग्रमा ९–अन्डर १२७ को स्कोर बनाउन सफल भएका छन् । भुवनले पहिलो दिन ५–अन्डर ६३ स्कोर गरेका थिए ।
१–अन्डर ६७ अंक बनाएका रमेश अधिकारीले समग्रमा २–अन्डर १३४ स्कोर गर्दै तेस्रो स्थानमा उक्लिन सफल भएका छन् । रमेशले पहिलो दिन पनि १–अन्डर ६७ अंक स्कोर गरेका थिए ।
एमेच्योरतर्फ अजित बिके समग्रमा ६–ओभर १४२ को स्कोरसहित शीर्षस्थानमा कायमै छन् । उनले आज ४–ओभर ७२ मा खेल सकाएका थिए ।
दोस्रो स्थानमा रहन सफल सुरेश तामाङ र तेस्रो स्थानका प्रज्जवल गुरुङ अजित भन्दा १७ स्ट्रोकले पछि छन् ।
प्रतियोगिताको विजेताले एक लाख १६ हजार रूपैयाँ नगद प्राप्त गर्नेछन् । उपविजेता खेलाडीले ७४ हजार तथा तेस्रो हुनेले ६३ हजार रूपैयाँ प्राप्त गर्नेछन् ।
त्यस्तै, उत्कृष्ट २१ भित्र पर्न सफल सबै प्रोफेसनल खेलाडीले नगद पुरस्कार प्राप्त गर्नेछन् ।
लेखक
