एजेन्सी । वेस्ट इन्डिजमा जारी आईसीसी टि–२० विश्वकपअन्तर्गत सुपर ८ को खेलमा बंगलादेशमाथि अष्ट्रेलियाले जित निकालेको छ ।
शुक्रवार विहान वर्षाले प्रभावित खेलमा बंगलादेशमाथि उपाधि दाबेदार राष्ट्र अष्ट्रेलियाले डिएलएस पद्दतीमार्फत् २८ रनको जित निकालेको हो ।
जितसंगै अष्ट्रेलियाले सुपर ग्रुप १ मा २ अंक जोडेको छ ।
अन्टिगुवा एन्ड बारबुडास्थित सर भिभियान रिर्चाड्स स्टेडियममा भएको खेलमा १४० रनको सामान्य विजयी लक्ष्यका साथ जवाफी ब्याटिङमा उत्रिएको अष्ट्रेलियाले ११.२ ओभरमा २ विकेट गुमाउँदै १०० जोड्दै खेलिरहँदा वर्षाले खेल बिथोलियो ।
त्यसपछि खेल पुनः सुरु हुन नसकेपछि डिएलएस पद्दती अनुसार अष्ट्रेलिया विजयी भयो ।
अष्ट्रेलियाका लागि ओपनर ब्याट्सम्यान डेभिड वार्नरले ३५ बलमा ५ चौका र ३ छक्का प्रहार गर्दै ५३ रनको अर्धशतकिय पारी खेल्दै अविजित रहँदा ग्लिन म्याक्सवेल पनि ६ बलमा १ चौका र १ छक्का प्रहार गर्दै १४ रन जोडेर अविजित रहे ।
यता, ट्रभिस हेडले २१ बल खेल्दै ३ चौका र २ छक्का प्रहार गरेर ३१ रन जोड्दै आउट हुँदा कप्तान मिट्चेल मार्श १ रनमा पेविलियन फर्किए ।
अष्ट्रेलियाले अतिरिक्त रुपमा १ रन जोड्यो ।
बंगलादेशका लागि रिशाद हुसेनले ३ ओभर बलिङ गर्दै २३ रन दिएर २ विकेट लिए ।
त्यसअघि टस हारेर पहिला ब्याटिङमा उत्रिएको बंगलादेशले निर्धारित २० ओभरको खेलमा ८ विकेट गुमाउँदै १४० रन जोड्यो ।
बंगलादेशका लागि कप्तान नाजमुल हुसेन शान्तोले ३६ बलमा ५ चौका र १ छक्का प्रहार गर्दै ४१ रन जोडेर आउट हुँदा तौहिद हृदयले २८ बल खेल्नेक्रममा २ चौका र २ छक्का प्रहार गर्दै ४० रन जोडेर आउट भए ।
त्यस्तै, ओपनर ब्याट्सम्यान तथा विकेटकिपर लिटन दासले २५ बल खेल्नेक्रममा २ चौका प्रहार गरेर १६ रन जोड्दै आउट हुँदा तास्किन अहमेदले ७ बलमा १ चौका प्रहार गरेर १३ रन जोड्दै अविजित रहे ।
यता, शकिब अल हसन ८, रिशाद हुसेन र महमुदुल्लाह समान २–२ रनमा आउट हुँदा तान्जिम हसन सकिब ४ रनमा अविजित रहे ।
बंगलादेशका अर्का ओपनर तान्जिद हसन र माहेदी हसन शुन्य रनमा पेविलियन फर्किए ।
बंगलादेशले अतिरिक्त रुपमा १४ रन जोड्यो ।
अष्ट्रेलियाका लागि प्याट कमिन्सले ४ ओभर बलिङ गर्दै २९ रन दिएर३ विकेट लिए ।
कमिन्सले ह्याट्रिक विकेट लिएका थिए ।
त्यस्तै, एडम जाम्पाले ४ ओभर बलिङ गर्दै २४ रन दिएर २ विकेट लिँदा मिट्चेल स्टार्क, मार्कुस स्टोइनिस र ग्लिन म्याक्सवेलले समान १–१ विकेट लिए ।
लेखक
