एजेन्सी । लिग लिडर इन्टर मिलानले इटालियन सिरी ए अन्तर्गत खेलमा तुलनात्मक रुपमा कमजोर प्रतिद्वन्दी सालेरनिटानामाथि फराकिलो जित निकालेको छ ।
शुक्रवार राति भएको खेलमा उपाधि दाबेदार टोली इन्टर मिलानले तालिकाको पुच्छारमा रहेको सालेरनिटानामाथि ४–० को फराकिलो जित निकालेको हो ।
इन्टरको घरेलु मैदान स्टाडिओ गिउसेप्पे मियाजा रंगशालामा भएको खेलमा घरेलु टोलीको जितमा माकुर्स थुराम, लाउटारो मार्टिनेज, डेनजेल डुमफ्रिज र मार्को अर्नाउटोभिकले गोल गरे ।
खेलको १७ औं मिनेटमा कार्लोस अगस्टोको असिस्टमा थुरामले गोल गर्दै घरेलु टोलीलाई सुरुवाती अग्रता दिलाए ।
त्यसको दुई मिनेटपछि नै अगस्टोकै असिस्टमा मार्टिनेजले गोल गर्दा इन्टर २–० ले अघि बढ्यो ।
त्यस्तै, ४० औं मिनेटमा डुमफ्रिजले गोल थप्दा इन्टर पहिलो हाफसम्ममा ३–० को स्पष्ट अग्रतामा अघि बढ्यो ।
यता, खेलको अन्त्यतिर ९० औं मिनेटमा अर्नाउटोभिकले गोल थप्दा इन्टर ४–० ले विजयी भयो ।
फराकिलो जितसंगै इन्टरले २४ लिग खेल खेलिसक्दा ६३ अंक जोड्दै तालिकाको शीर्ष स्थानमा बलियो पकड कायम गरेको छ ।
पराजित सालेरनिटानाको २५ खेलमा १३ अंकसहित तालिकाको पुच्छारमा छ ।
लेखक
