एजेन्सी । इंग्लिस महारथी म्यानचेस्टर सिटीले इंग्लिस फुटबलको लोकप्रिय घरेलु लिग प्रिमियर लिगको उपाधि रक्षा गरेको छ ।
आईतवार राति भएको सिजनको अन्तिम खेलमा वेस्टह्याम युनाइटेडमाथि ३–१ को जित निकाल्दै साविक विजेतासमेत रहेको म्यानचेस्टर सिटीले प्रिमियर लिगको उपाधि रक्षा गरेको हो ।
सिटीको घरेलु मैदान इतिहाद रंगशालामा भएको खेलमा घरेलु टोलीलाई उपाधि दिलाउन फिल फोडेनले दुई गोल गर्दा रोड्रीले अर्को एक गोल गरे ।
पराजित भ्रमणकारी टोलीका लागि मोहम्मेद कुदुसले एक गोल फर्काए ।
खेल सुरु भएको दोस्रो मिनेटमै बर्नाडो सिल्भाको पासमा फोडेनले गोल गर्दै घरेलु टोलीलाई सुरुवाती अग्रता दिलाए ।
त्यसपछि १८ औं मिनेटमा जेरेमी डोकुको पासमा फोडेनले व्यक्तिगत रुपमा दोस्रो गोल थप्दा सिटी २–० ले अघि बढ्यो ।
तर, ४२ औं मिनेटमा कुदुसले वेस्टह्यामका लागि गोल फर्काउँदा खेल २–१ को स्थितिमा आयो ।
त्यसपछि दोस्रो हाफको ५९ औं मिनेटमा सिल्भाको असिस्टमा रोड्रीले गोल थप्दा सिटी ३–१ ले विजयी भयो ।
सहज जितसंगै लिग लिडर सिटीले लिगमा ३८ खेलबाट ९१ अंक जोड्यो ।
यो भनेको निकतम प्रतिद्वन्दी आर्सनलको भन्दा दुई अंकले बढी हो ।
गयराति इमिरेट्स रंगशालामा एभर्टनविरुद्व २–१ को जित निकालेको आर्सनलको समान ३८ खेलमा ८९ अंक रह्यो ।
प्रिमियर लिगको उपाधि रक्षा गरेसंगै पेप ग्वार्डिओलाको नेतृत्वमा रहेको सिटीले लगातार चारपल्ट लिग जित्ने क्रीतिमान पनि कायम गर्यो ।
प्रिमियर लिगमा हालसम्म सिटीका अलावा कुनैपनि टोलीले लगातार चारपल्ट लिगको उपाधि उचाल्न सकेको छैन ।
गयराति नै भएको अन्य खेलहरुमा लिभरपूलले उल्भ्समाथि २–० को जित निकाल्दा क्रिस्टल प्लालेसले एस्टनभिल्लामाथि ५–० को फराकिलो जित रच्यो ।
त्यस्तै, म्यानचेस्टर युनाइटेडले ब्राइटनमाथि २–० को जित हासिल गर्दा टोटनहम हटस्परले सेफिल्ड युनाइटेडमाथि ३–० को जित निकाल्यो ।
यता, चेल्सीले एएफसी बर्नमाउथमाथि २–१ को जित निकाल्दा न्युक्यासल युनाइटेडले ब्रेन्टफोर्डमाथि ४–२ को जित हासिल गर्यो ।
त्यस्तैगरी फुलहमले लुटन टाउनमाथि ४–२ को जित हात पार्दा नटिङघम फोरेस्टले बर्नलीमाथि २–१ को जित निकाल्यो ।
लेखक
