एजेन्सी । आईभरी कोस्टमा जारी अफ्रिका कप अफ नेसन्सअन्तर्गत खेलमा सेनेगलले गिनीमाथि सहज जित निकालेको छ ।
मंगलवार राति भएको खेलमा साविक विजेता सेनेगलले गिनीमाथि २–० को जित निकालेको हो ।
स्टेड चार्लिस कोनान बान्नी दि यामौस्सौक्रो रंगशालामा भएको खेलमा अब्दौलाय सेक र एलाइमन एनडाईले गोल गरे ।
पहिलो हाफ गोलरहित बराबरीमा सकिएको खेलमा दोस्रो हाफको ६१ औं मिनेटमा क्रेपिन डियाटाको असिस्टमा सेकले गोल गर्दै सेनेगललाई १–० को अग्रता दिलाए ।
त्यसपछि खेलको अन्त्यतिर ९० औं मिनेटमा साडियो मानेको पासमा एनडाईले गोल गर्दै सेनेगललाई २–० ले जित दिलाए ।
सहज जितसंगै सेनेगलले समूह ‘सी’ शतप्रतिशत जित हासिल गर्दै ९ अंक जोडेर समूह विजेताका रुपमा अघिल्लो चरण प्रवेश गर्यो ।
पराजित गिनीको ३ खेलमा ४ अंक रहेको छ । गिनी तालिकाको तेस्रो स्थानमा रहेको छ ।
यता, सोहि समूहको अर्को खेलमा क्यामरनले गाम्बियामाथि ३–२ को जित निकालेको छ ।
पहिलो हाफ गोलरहित बराबरीमा सकिएको खेलमा दोस्रो हाफको ५६ औं मिनेटमा कार्ल टोको इकाम्बीको गोलमार्फत् क्यामरनले सुरुवाती अग्रता लियो ।
तर, ७२ औं मिनेटमा अब्ली जाल्लोले गाम्बियाका लागि गोल फर्काउँदा खेल १–१ को बराबरीमा आयो ।
त्यसपछि ८५ औं मिनेटमा इबरिमा कोल्लेले गोल गर्दै गाम्बियालाई २–१ ले अघि बढाए ।
त्यसको २ मिनेटपछि नै गाम्बियाकै जेम्स गोमेजले आत्मघाती गोल गर्दा क्यामरन २–२ को बराबरीमा आयो ।
त्यसपछि निर्धारित ९० मिनेटपछि थपिएको इन्जुरी समयको पहिलो मिनेटमा क्रिस्टोफर उले गोल गर्दा क्यामरन ३–२ ले विजयी भयो ।
प्रतिस्पर्धात्मक जितसंगै क्यामरनले समूह ‘सी’ मा ३ खेलबाट ४ अंक जोड्दै समूह उपविजेता बन्दै अन्तिम १६ मा प्रवेश गरेको छ ।
लेखक
