एजेन्सी । साविक विजेता श्रीलंकाले १६ औं संस्करणको एसीसी एसिया कपअन्तर्गत पहिलो खेलमा बंगलादेशमाथि जित हात पार्दै प्रतियोगितामा विजयी सुरुवात गरेको छ ।
विहिवार भएको खेलमा सह–आयोजक समेत रहेको श्रीलंकाले बंगलादेशमाथि ५ विकेटको जित हात पार्दै प्रतियोगितामा विजयी सुरुवात गरेको हो ।
महत्वपूर्ण जितसंगै समूह ‘बी’ मा रहेको श्रीलंकाले २ अंक जोडेको छ ।
श्रीलंकास्थित पाल्लेकेले अन्तराष्ट्रिय क्रिकेट रंगशालामा भएको खेलमा १६५ रनको सामान्य विजयी लक्ष्य पछ्याएको घरेलु टोलीले ३९ ओभर खेल्दै ५ विकेट गुमाउँदै लक्ष्य पुरा गर्यो ।
श्रीलंकाको जितमा चरिथ असलङ्गाले ९२ बलमा ५ चौका र १ छक्का प्रहार गर्दै ६२ रनको अर्धशतकिय पारी खेल्दै अविजित रहँदा कप्तान दासुन शानाकाले २१ बलमा १ चौका मद्दतमा १४ रन जोड्दै अविजित रहे ।
सदिरा समराविक्रमाले ७७ बलमा ६ चौका प्रहार गर्दै ५४ रनको अर्धशतकिय पारी खेले ।
त्यस्तै, पाथुम निस्साङ्काले १३ बलमा १ चौका प्रहार गर्दै १४ रन बनाउँदै पेविलियन फर्किदा विकेटकिपर कुशल मेन्डिसले ५, धनन्जय दि सिल्भाले २ र दिमुथ करुणारत्नेले १ रन बनाउँदै पेविलियन फर्किए ।
श्रीलंकाले अतिरिक्त रुपमा १३ रन जोड्यो ।
बंगलादेशका लागि कप्तान शकिब अल हसनले १० ओभर बलिङ गर्दै २ मेडन राखेर २९ रन दिँदै २ विकेट लिए ।
त्यस्तै, तास्किन अहमेद, शोरिफुल इस्लाम र माहेदी हसनले समान १–१ विकेट लिए ।
त्यसअघि टस जितेर पहिला ब्याटिङमा उत्रिएको बंगलादेशले ४२.४ ओभरमा अलआउट हुँदै १६४ रन बनायो ।
बंगलादेशका लागि नाजमुल हुसेन शान्तोले १२२ बलमा ७ चौका प्रहार गर्दै सर्वाधिक ८९ रनको अर्धशतकिय पारी खेल्दा टौहिद हृड्वयले ४१ बल खेल्दै २० रन बनाएर पेविलियन फर्किए ।
त्यस्तै, मोहम्मद नासिमले २३ बलमा ३ चौका प्रहार गर्दै १६ रन जोडेर पेविलियन फर्किदा विकेटकिपर मुश्फीक्युर रहिमले २२ बलमा १ चौका प्रहार गर्दै १३ रन बनाएर आउट भए ।
यता, कप्तान शकिब अल हसन ५, माहेदी हसन ६, मेहिदे हसन ५ रनमा आउट हुँदा तान्जिद हसन, तस्किन अहमेद र मुस्तफिजुर रहमान शुन्य रनमा पेविलियन फर्किए ।
शोरीफुल इस्लाम २ रनमा अविजित रहे । बंगलादेशले अतिरिक्त रुपमा ८ रन जोड्यो ।
घरेलु टोलीका लागि माथेशा पाथीराणाले ७.४ ओभर बलिङ गर्दै ३२ रन दिएर सर्वाधिक ४ विकेट लिँदा महेश थेकशानाले ८ ओभर बलिङ गर्दा १ मेडन राख्दै १९ रन दिएर २ विकेट हात पारे ।
त्यस्तै, कप्तान दासुन शानाका, धनन्जय दि सिल्भा र दुनिथ वेल्लालागेले समान १–१ विकेट लिए ।
प्रतियोगिताअन्तर्गत सेप्टेम्बर २ तारिख अर्थात् भदौ १६ गते सनिवार उपाधि दाबेदार टोलीद्वय पाकिस्तान र भारतबीच खेल हुनेछ ।
लेखक
