भक्तपुर । काठमाडौंमा जारी सहिद स्मारक ‘ए’ डिभिजन लिगअन्तर्गत आइतवारको तेस्रो खेलमा मछिन्द्र फुटबल क्लब जावलाखेल युवा क्लबसंग स्तब्ध बनेको छ ।
त्रिपुरेश्वरस्थित दशरथ रंगशालामा भएको खेलमा साविक विजेतासमेत रहेको मछिन्द्र फुटबल क्लब जावलाखेल युवा क्लबसंग ३–१ गोलअन्तरले पराजित भएको हो ।
खेलको २४ औं मिनेटमा देवेन्द्र तामाङले फ्रिकिकमार्फत गोल गर्दै मछिन्द्रले खेलमा सुरुवाती अग्रता दिलाए ।
पहिलो हाफ १–० ले अघि रहेको मछिन्द्रले दोस्रो हाफमा ३ गोल बेहोर्यो । ६० औं मिनेटमा जावलाखेलका हिसुफ थपलियाले गोल गर्दै खेललाई १–१ को बराबरीमा ल्याए ।
त्यसपछि ७४ औं मिनेटमा एनकोटो मोसाबीले मछिन्द्रका गोकिपर विशाल श्रेष्ठको गल्तीको फाइदा उठाउँदै जावलाखेललाई २–१ ले अघि बढाए ।
७६ औं मिनेटमा कप्तान सिमान्त थापाले गोल गर्दै जावलाखेलको जित पक्का गरे । जितसंगै जावलाखेलले महत्वपूर्ण ३ अंक जोडेको छ ।
यसअघि दशरथ रंगशालामा आजै भएको पहिलो खेलमा नेपाल आर्मी क्लब र संकटा क्लबले गोलरहित बराबरी खेल्दै अंक बाँड्दा च्यासल रंगशालामा भएको खेलमा सातदोबाटो युवा क्लबले एनआरटीलाई २–१ ले पराजित गरेको छ ।
लेखक
