भक्तपुर । उत्तर अफ्रिकी राष्ट्र मोरक्कोलाई पराजित गर्दै फ्रान्स कतारमा जारी फिफा विश्वकपको फाइनलमा प्रवेश गरेको छ ।
बुधवार राति भएको खेलमा साविक विजेतासमेत रहेको फ्रान्सले मोरक्कोमाथि २–० को जित हात पार्दै उपाधि रक्षा अभियान जारी राखेको हो ।
अब डिडियर डसच्याम्पको नेतृत्वमा रहेको टिमले लियोनल मेसीको टिमविरुद्व अनुकुल नतिजा निकालेको खण्डमा उपाधि रक्षा गर्नेछ ।
फ्रान्सका लागि थियो हर्नाडेज र रानदाल कोलो मुआनीले एक एक गोल गरे ।
अल ब्याट रंगशालामा खेल सुरु भएको पाचौं मिनेटमै साविक विजेताले हर्नाडेजको गोलमार्फत सुरुवाती अग्रता लिएको थियो ।
पहिलो हाफ १–० ले अघि रहेको फ्रान्सले दोस्रो हाफको ७९ औं मिनेटमा अग्रता दोब्बर पार्यो ।
फ्रान्सका लागि परिवर्तित खेलाडीका रुपमा ओसमान डेम्बेलेको स्थानमा मैदान प्रवेश गरेका रानदाल कोलो मुआनी गोल गर्दै फ्रान्सलाई २–० को जित दिलाए ।
रोमाञ्चक खेलमा मोरक्कोले बलियो फ्रान्सविरुद्व करिब ६१.२ प्रतिशत बल नियन्त्रणमा राखेर दवाव सिर्जना गरेता पनि गोल गर्न नसक्दा पराजय बेहोर्नु पर्यो ।
खेल अवधिभर फ्रान्सले १४ सट प्रहार गर्दा ३ सट टार्गेटमा लागेको थियो, जसमा उसले २ गोल गर्न सफल भयो ।
यता, मोरक्कोले खेलभरी १३ सट प्रहार गर्दा ३ सट टार्गेटमा पार्दा गोल भने निकाल्न सकेन ।
अब साविक विजेता फ्रान्सले उपाधिका लागि आइतवार अर्जेन्टिनासंग सामना गर्दा मोरक्कोले भने तेस्रो स्थानका लागि क्रोएसियासंग सनिवार प्रतिस्पर्धा गर्नेछ ।
लेखक
