एजेन्सी । संयुक्त राज्य अमेरिकामा जारी कोपा अमेरिकाअन्तर्गत क्वाटरफाइनल खेलमा जित निकाल्दै अर्जेन्टिना सेमिफाइनलमा प्रवेश गरेको छ ।
शुक्रवार विहान भएको क्वाटरफाइनल खेलमा इक्वेडरमाथि ट्राइब्रेकरमा ४–२ को जित निकाल्दै साविक विजेता अर्जेन्टिना कोपा अमेरिकाको सेमिफाइनलमा प्रवेश गरेको हो ।
टेक्सासको हौस्टनस्थित एनआरजी स्टेडियममा भएको निर्धारित ९० मिनेटको खेल १–१ को बराबरीमा सकिएसंगै खेलको निर्णय ट्राइब्रेकरबाट भयो ।
ट्राइब्रेकरमा साविक विजेता टोलीलाई जित दिलाउन जुलियान अल्भारेज, एलेक्सिस म्याक अलीस्टार, गोन्जालो मोन्टिएल र निकोलास ओटामेन्डीले गोल गरे ।
अर्जेन्टिनाका कप्तान लियोनल मेसीको प्रहार क्रस बारमा लाग्दै बाहिरिए ।
अर्जेन्टिनालाई सेमिफाइनल पु¥याउन गोलकिपर इमिलियानो मार्टिनेजले महत्वपूर्ण दुई पेनाल्टी सेभ गरे ।
यता, इक्वेडरका लागि जोन याबोह र जोर्डी काइसेडोले पेनाल्टीमा गोल गर्दा एलान मिन्डा र एन्जेल मिनाले चुकाए ।
त्यसअघि निर्धारित समयको खेलको ३५ औं मिनेटमा एलेक्सिस म्याक अलीस्टारको पासमा लिसान्ड्रो मार्टिनेजले गोल गर्दै अर्जेन्टिनालाई १–० ले अघि बढाए ।
यता, दोस्रो हाफको ६० औं मिनेटमा इक्वेडरले खेलमा फर्किने सुनौलो अवसर गुमायो ।
प्राप्त पेनाल्टीमा इनर भ्यालेन्सिया चुक्दा इक्वेडर खेल बराबरी गर्नबाट बञ्चित बन्यो ।
तर, निर्धारित समयको अन्त्यतिर इन्जुरी समयको पहिलो मिनेटमा इक्वेडरका लागि जोन यबोहको पासमा केभिन रोड्रिगुएजले गोल फर्काउँदा खेललाई १–१ को बराबरीमा आयो ।
निर्धारित समयमा खेल १–१ को बराबरीमा सकिएसंगै खेलको निर्णय ट्राइब्रेकरबाट भयो ।
लेखक
