एजेन्सी । पञ्जाव किंग्सले इन्डियन प्रिमियर लिग (आईपिएल) अन्तर्गत खेलमा गुजरात टाइटन्समाथि रोमाञ्चक जित निकालेको छ ।
विहिवार राति भएको आईपिएल खेलमा पञ्जाव किंग्सले साविक उपविजेता समेत रहेको गुजरात टाइटन्समाथि रोमाञ्चक ३ विकेटको जित निकालेको हो ।
जितसंगै पञ्जावले ४ खेलबाट ४ नै अंक जोड्दै लिग तालिकाको पाँचौं स्थानमा उक्लिएको छ ।
पराजित गुजरातको भने समान ४ खेलबाट २ अंकसहित तालिकाको छैटौं स्थानमा रहेको छ ।
गुजरातको घरेलु मैदान नरेन्द्र मोदी रंगशालामा भएको खेलमा २०० रनको विजयी लक्ष्य पछ्याएको पञ्जावले १९.५ ओभरमा ७ विकेट गुमाउँदै पूरा गर्यो ।
पञ्जावको जितमा शशांक सिंहले २९ बलमा ६ चौका र ४ छक्का प्रहार गर्दै ६१ रनको अर्धशतकिय पारी खेल्दै अविजित रहँदा प्रभसिमरन सिंहले २४ बल खेल्दै ५ चौका र १ छक्का प्रहार गर्दै ३५ रन जोडेर पेविलियन फर्किए ।
त्यस्तै, इम्प्याक्ट प्लेयरका रुपमा मैदान छिरेका आशुतोष शर्माले १७ बलमा ३ चौका र १ छक्का प्रहार गर्दै ३१ रन जोड्दा ओपनर ब्याट्सम्यान जोनी बाइस्ट्रोले १३ बल खेल्नेक्रममा ४ चौका प्रहार गरेर २२ रन जोडेर पेविलियन फर्किए ।
यता, विकेटकिपर जितेश शर्माले ८ बलमा २ छक्का प्रहार गर्दै १६ रन जोड्दै पेविलियन फर्किदा सिकन्दर राजाले १६ बलमा १५ रन जोडेर आउट भए ।
कप्तान शिखर धवन १ र साम करन ५ रनमा पेविलियन फर्किदा हरप्रित बरार १ रनमा अविजित रहे ।
पञ्जावले अतिरिक्त रुपमा १३ रन जोड्यो ।
गुजरातका लागि नुर अहमदले २ विकेट लिँदा अज्मतुल्लाह ओमारजाई, उमेश यादव, राशिद खान, मोहित शर्मा र दर्शन नालकान्देले समान १–१ विकेट लिए ।
त्यसअघि टस हारेर पहिला ब्याटिङमा उत्रिएको गुजरातले निर्धारित २० ओभरको खेलमा ४ विकेट गुमाउँदै १९९ रन जोड्यो ।
गुजरातका लागि शुबमन गिले ४८ बलमा ६ चौका र ४ छक्का प्रहार गर्दै सर्वाधिक ८९ रनको अत्र्रशतकिय पारी खेल्दा साई सुदर्शनले १९ बल खेल्नेक्रममा ४ चौका प्रहार गरेर ३३ रन जोडेर पेविलियन फर्किए ।
त्यस्तै, राहुल तेवातियाले ८ बलमा ३ चौका र १ छक्का प्रहार गर्दै २३ रन जोडे अविजित रहँदा केन विलियम्सनले २२ बल खेल्दै ४ चौका प्रहार गरेर २६ रन जोड्दै पेविलियन फर्किए ।
यता, ओपनर ब्याट्सम्यान तथा विकेटकिपर वृद्दिमन साहाले १३ बलमा २ चौका प्रहार गर्दै ११ रन जोडेर आउट हुँदा विजय शंकर ८ रनमा पेविलियन फर्किए ।
गुजरातले अतिरिक्त रुपमा ९ रन जोड्यो ।
पञ्जावका लागि कागिसो राबडाले २ विकेट लिँदा हरप्रित बरार र हर्षल पटेलले समान १–१ विकेट लिए ।
लेखक
