भक्तपुर । नेपाली महिला फुटबलकी स्टार फरवार्ड साबित्रा भण्डारी (साम्बा) फ्रान्सेली क्लब एन एभेन्ट गुइनग्याम्पमा अनुबन्ध भएकी छिन् ।
इजरायलको हापोएल रानानाबाट फ्रान्सेली शीर्ष श्रेणी डिभिजन वान फेमिनेनको महिला फुटबल क्लब एन एभेनट गुइनग्याम्पमा साम्बा अनुबन्ध भएकी हुन् ।
नेपाली फटबलमा गोल मेसिनका रुपमा समेत चिनिने साम्बाले फ्रान्सेली क्लबसंग डेढ वर्षको सम्झौता गरेको बताइएको छ ।
विहिवार राति एन एभेन्ट गुइनग्याम्पले सामाजिक सञ्जाल फेसबुक पेजमार्फत् २६ वर्षिय नेपाली फरवार्डलाई सार्वजनिक गरेको हो ।
इजराइलमा छोटो समय बिताउँदा राम्रो प्रभाव छाड्न सफल भएसंगै साम्बा युरोपेली फुटबलको उर्बरमध्येको एक फ्रान्स पुग्न सफल भएको छ ।
नेपाली घरेलु फुटबलमा एपिएफबाट खेल्ने गरेकी साम्बाले अब फ्रान्सेली महारथी क्लब पेरिस सेन्ट जर्मन (पिएसजी), ओलम्पिक लियोन, रेम्स लिल जस्ता चर्चित क्लबविरुद्व खेल्न पाउने भएकी छन् ।
फ्रान्सेली महिला शीर्ष लिग डिभिजन वान फेमिनेनमा १२ टोली रहेको छ ।
जसमा साम्बा आबद्व क्लब जारी सिजन १२ खेल खेलिसक्दा २ खेलमा जित, २ मा बराबरी र ८ खेलमा हारको नतिजाका साथ ८ अंक जोडेर तालिकाको १० औं स्थानमा रहेको छ ।
यो भनेको रेलिगेशन जोनबाट माथि हो ।
सम्भवत साम्बाले सनिवार बोर्डेउक्सविरुद्व डेब्यु गन सम्भावना रहेको छ ।
२८ नम्बरको जर्सी लगाउने साम्बाले फ्रान्सेली क्लबलाई रेलिगेशनबाट जोगाउँदै शीर्ष श्रेणीमै कायम राख्ने जिम्मेवारी बहन गर्नुपर्ने छ ।
दक्षिण एसियाकै उत्कृष्ट महिला फरवार्डका रुपमा परिचय बनाएका साम्बाले भारतको शीर्ष महिला लिग इन्डियन वुमन्स लिगमा सेथु एफसीका लागि सन् २०१८–१९ सिजनमा ७ खेल खेल्दै १५ गोल गरेकी थिइन् ।
त्यसपछि सन् २०१९ देखि २०२३ सम्म गोकुलम केरेलाबाट खेलेकी उनले १७ खेलमा ४५ गोल गरेकी थिइन् ।
त्यसपछि सन् २०२३ मा इजरायली क्लब हापोयल रानाना पुगेकी थिइन् ।
साम्बाले नेपालका लागि ४२ खेलमा सर्वाधिक ४३ गोल गरेकी छिन् ।
लेखक
