भक्तपुर । नेपाल साफ यु–२० च्याम्पियनसिपको फाइनलमा बंगलादेशसंग पराजित भएको छ ।
बुधवार भएको फाइनल खेलमा नेपाल भ्रमणकारी टोली बंगलादेशसंग ४–१ ले पराजित भएको हो ।
ललितपुरको सातदोबाटोस्थित एन्फा कम्प्लेक्स मैदानमा भएको खेलमा बंगलदेशलाई उपाधि दिलाउन मिराजुल इस्लामले दुई गोल गर्दा रवि हुसेन राहुल र नोभाले एक–एक गोल थपे ।
नेपालका लागि समिर तामाङले सान्तोना गोल फर्काए ।
पहिलो हाफको इन्जुरी समयको दोस्रो मिनेटमा फ्रिकिक गोल गर्दै इस्लामले बंगलादेशलाई सुरुवाती अग्रता दिलाए ।
त्यसपछि दोस्रो हाफको ५५ औं मिनेटमा इस्लामले नै गोल थप्दै बंगलादेशलाई २–० ले अघि बढाए ।
त्यस्तै, ७० औं मिनेटमा राहुलले गोल थप्दै भ्रमणकारी टोलीलाई ३–० को सहज अग्रतामा अघि बढाए ।
यता, ८० औं मिनेटमा समिरले नेपालका लागि गोल फर्काउँदै खेललाई ३–१ को अवस्थामा ल्याए ।
तर, इन्जुरी समयको पाँचौं मिनेटमा नोभाले गोल थप्दा बंगलादेश ४–१ ले विजयी भयो ।
योसंगै २० वर्षमुनीको साफमा बंगलादेशले पहिलो उपाधि जित्दा घरेलु टोली नेपाल भने उपविजेतामै सिमित भयो ।
लेखक
