एजेन्सी । उरुग्वेले कोपा अमेरिकाअन्तर्गत खेलमा संयुक्त राज्य अमेरिकालाई पराजित गरेको छ ।
मंगलवार विहान भएको खेलमा उरुग्वेले आयोजक राष्ट्र अमेरिकालाई १–० ले पराजित गरेको हो ।
मिसौरीको कान्सास सिटीस्थित अरोहेड स्टेडियममा भएको खेलमा माथियास ओलिभेराले निर्णायक गोल गर्दै उरुग्वेलाई जिताए ।
पहिलो हाफ गोलरहित बराबरीमा सकिएको खेलमा दोस्रो हाफको ६६ औं मिनेटमा ओलिभेराले गोल गर्दा उरुग्वे १–० ले विजयी भयो ।
महत्वपूर्ण जितसंगै उरुग्वेले समूह ‘सी’ मा शतप्रतिशत जित निकाल्न सफल भयो ।
उरुग्वेले तीन खेलबाट ९ अंक जोड्दै समूह विजेताका रुपमा क्वाटरफाइनलमा प्रवेश गर्यो ।
पराजित अमेरिकाको भने समूह चरणको तीन खेलबाट एकमा जित र दुईमा हारसहित तीन अंकका साथ तालिकाको तेस्रोमा रहँदै प्रतियोगिताबाट बाहिरियो ।
त्यस्तै, फ्लोरिडाको ओर्लान्डोस्थित इन्टर एन्ड को स्टेडियममा भएको सोहि समूहको अर्को खेलमा पानामाले बोलिभियालाई ३–१ ले हरायो ।
पहिलो हाफको २२ औं मिनेटमा क्रिस्टियन मार्टिनेजको पासमा जोसे फाजार्डोले गोल गर्दै पानामालाई सुरुवाती अग्रता दिलाए ।
तर, दोस्रो हाफको ६९ औं मिनेटमा बोलिभियाका रामिरो भाकाको पासमा ब्रुनो मिरान्डाले गोल फर्काउँदा खेल १–१ को बराबरीमा आयो ।
त्यस्तै, ७९ औं मिनेटमा इरिक डाभिसको पासमा इडेवार्डो गुएरेरोले गोल गर्दा पुनः पानामा २–१ ले खेलमा अघि बढ्यो ।
खेलको अन्त्यतिर इन्जुरी समयको पहिलो मिनेटमा सेरार यानिसले गोल थप्दा पानामा ३–१ ले विजयी भयो ।
सहज जितसंगै पानामाले तीन खेलबाट दुईमा जित र एकमा हारको नतिजासहित ६ अंक जोड्दै समूह उपविजेता बन्यो ।
योसंगै पानामा प्रतियोगिताको क्वाटरफाइनलमा प्रवेश गर्यो ।
पराजित बोलिभियाले भने समूह चरणमा सबै तीन खेलमै हार बेहोर्दै अंकको खाता नै नखोलि प्रतियोगिताबाट घर फर्कियो ।
लेखक
