एजेन्सी । स्पेनिस ला लिगामा बार्सिलोनाले सेभिल्लामाथि जित हात पारेसंगै लिग तालिकामा ८ अंकको स्पष्ट अग्रता लिएको छ ।
आइतवार राति भएको खेलमा लिग लिडर बार्सिलोनाले सेभिल्लामाथि ३–० को सहज जित हात पार्दै लिग तालिकामा ८ अंकको स्पष्ट अग्रता लिएको हो ।
क्याम्प नाउ रंगशालामा भएको खेलमा बार्साका लागि जोर्डी अल्भा, गाभी र राफिन्नाले गोल गरेका थिए ।
पहिलो हाफ गोलरहित बराबरीमा सकिएको खेलमा दोस्रो हाफको ५८ औं मिनेटमा जोर्डी अल्भाले गोल गर्दै बार्सालाई खेलमा अग्रता दिलाएका थिए । उक्त गोलका लागि फ्यांक केसेईले पास उपलब्ध गराएका थिए ।
त्यसपछि खेलको ७० औं मिनेटमा राफिन्नाको पासमा गाभीले गोल गर्दा बार्सा खेलमा २–० ले अघि बढ्यो ।
७९ औं मिनेटमा जोर्डी अल्भाको असिस्टमा राफिन्नाले गोल गर्दा बार्साले खेल सहज रुपमा ३–० ले जित्यो ।
घरेलु टोलीले २० खेलमा ५३ अंक जोडेको छ । यो भनेको दोस्रो स्थानमा रहेको रियल मड्रिडको भन्दा ८ अंक बढि अग्रता हो ।
पराजित सेभिल्लाको समान खेलमा २१ अंक छ । सेभिल्ला तालिकाको १६ औं स्थानमा झरेको छ ।
लेखक
