एजेन्सी । दक्षिण अफ्रिकामा जारी आईसीसी महिला टि–२० विश्वकपमा वेस्ट इन्डिजले पाकिस्तानलाई ३ रनले पराजित गरेको छ ।
आइतवार राति भएको खेलमा ११७ रनको विजयी लक्ष्य पछ्याएको पाकिस्तान निर्धारित २० ओभरको खेलमा ५ विकेटको क्षतिमा ११३ रनमा समेतिएसंगै वेस्ट इन्डिज ३ रनले विजयी भएको हो ।
बोलाण्ड पार्क रंगशालामा भएको खेलमा पाकिस्तानका लागि आलिया रियाजले २३ बलमा ४ चौका मद्दतमा २९ रन जोड्दा निदा दारले ३१ बलमा १ चौका प्रहार गर्दै २७ रन जोडिन् ।
त्यस्तै, कप्तान बिस्मह मारुफले ३३ बलमा २ चौका प्रहार गर्दै २६ रन बनाउँदा अन्य ब्याटरले दोहोरो अंकमा रन जोड्न सकेनन् । विकेटकिपर मुनिबा अलि ५, सिद्रा आमेन ८ रनमा आउट हुँदा फातिमा साना ९ रनमा अविजित रहिन् ।
वेस्ट इन्डिजका लागि कप्तान हेली म्याथ्युजले २ विकेट लिँदा शमेलिया कनेल, करिश्मा रामाराक र अफि फ्रलेचरले समान १–१ विकेट लिईन् ।
त्यसअघि टस जितेर पहिला ब्याटिङमा उत्रिएको वेस्ट इन्डिजले निर्धारित २० ओभरको खेलमा ६ विकेट गुमाउँदै ११६ रन बनाएको थियो ।
वेस्ट इन्डिजका लागि विकेटकिपर राशादा विलियम्सले ३४ बलमा २ चौका प्रहार गर्दै सर्वाधिक ३० रन बनाईन् ।
त्यस्तै, शेमेइन क्याम्पबलले २६ बलमा १ चौका मद्दतमा २२ रन जोड्दा कप्तान हेइली म्याथ्युजले २१ बल खेल्दै ३ चौका मद्दतमा २० रन जोडिन् ।
सबिका गजनबीले १३ रनमा आउट हुँदा सिनेली हेनरी ११ रनमा पेविलियन फर्किइन् । वेस्ट इन्डिजका अन्य ब्याटरले दोहोरो अंकमा रन जोड्न सकेनन् ।
अलिया अलेयान ९ रनमा आउट हुँदा अफि फ्रलेचर ४ तथा त्रिशान होल्डर १ रनमा अविजित रहिन् ।
पाकिस्तानका लागि निदा दारले २ विकेट लिँदा साहिदा इकबाल, फातिमा साना, नाशरा सन्धु र तुबा हसनले समान १–१ विकेट लिईन् ।
पाकिस्तानमाथि जित हात पारेको वेस्ट इन्डिजको जारी विश्वकपमा ४ खेलमा ४ अंक भएको छ । पराजित पाकिस्तानको भने ३ खेलमा २ अंक छ ।
वेस्ट इन्डिज समूह ‘बी’ को तेस्रो स्थानमा रहँदा पाकिस्तान चौथौं स्थानमा छ ।
लेखक
