एजेन्सी । उपाधि होडमा रहेको आर्सनल इंग्लिस प्रिमियर लिगअन्तर्गत खेलमा वेस्टह्याम युनाइटेडसंग स्तब्ध बनेको छ ।
विहिवार राति भएको खेलमा तुलनात्मक रुपमा बलियो आर्सनल वेस्टह्याम युनाइटेडसंग २–० ले स्तब्ध बनेको हो ।
आर्सनलको घरेलु मैदान इमिरेट्स रंगशालामा भएको खेलमा भ्रमणकारी टोलीका लागि टोमस सौचेक र कोनस्टानटिनोस माभरोपानोसले गोल गरे ।
खेल सुरु भएको १३ औं मिनेटमा जारोर्ड बोवेनको पासमा सौचेकले गोल गर्दै वेस्टह्यामलाई सुरुवाती अग्रता दिलाए ।
त्यसपछि दोस्रो हाफको ५५ औं मिनेटमा जेम्स वार्ड प्रोउसेको असिस्टमा माभरोपानोसले गोल थप्दा भ्रमणकारी टोली २–० ले अघि बढ्यो ।
यता, खेलको अन्त्यतिर वेस्टह्याका सैद बनेराम्हा पेनाल्टीमा चुक्दा अग्रता बढाउने अवसर भने भ्रमणकारी टोलीले चुकायो ।
महत्वपूर्ण जितसंगै वेस्टह्यामले १९ खेलमा ३३ अंक जोड्दै लिग तालिकाको छैटौं स्थानमा रहेको छ ।
पराजित आर्सनलको भने समान १९ खेलमा ४० अंकका साथ तालिकाको दोस्रो स्थानमा रहेको छ ।
हारसंगै आर्सनलको तालिकाको शीर्ष स्थानमा उक्लिने मौका भने गुमेको छ ।
यता, गयराति नै भएको अर्को खेलमा ब्राइटनले टोटनहम हटस्परलाई ४–२ ले पराजित गरेको छ ।
ब्राइटनको घरेलु मैदान अमेक्स रंगशालामा भएको खेलमा ११ औं मिनेटमा ज्याक हिनसेलउडको गोलमार्फत घरेलु टोलीले सुरुवाती अग्रता लियो ।
त्यसपछि २३ औं मिनेटमा जोओ पेड्रोले पेनाल्टीमार्फत गोल थप्दा ब्राइटन २–० ले अघि बढ्यो ।
यता, दोस्रो हाफको ६३ औं मिनेटमा जेम्स मिल्नरको पासमा पेर्भिस इस्टुपिनानको गोलमार्फत घरेलु टोलीले ३–० को आरामदायी अग्रता लियो ।
त्यस्तै, ७५ औं मिनेटमा पेड्रोले पेनाल्टीमार्फत नै गोल थप्दा ब्राइटन ४–० को फराकिलो अग्रतातर्फ लम्कियो ।
तर, ८१ औं मिनेटमा सन ह्युङ मिनको पासमा अलेजो भेलिजले टोटनहमका लागि गोल फर्काउँदा खेल ४–१ को अवस्थामा आयो ।
त्यसपछि ८५ औं मिनेटमा टोटनहमका पेड्रो पोरोको पासमा बेन डाभिसले गोल फर्काउँदा खेल ४–२ ले सकियो ।
महत्वपूर्ण जितसंगै ब्राइटनले १९ खेलमा ३० अंक जोड्दै लिग तालिकाको आठौं स्थानमा उक्लिएको छ ।
पराजित टोटनहमको भने समान खेलमा ३६ अंक रहेको छ ।
टोटनहम तालिकाको छैटौं स्थानमा झरेको छ ।
लेखक
