एजेन्सी । विश्व विजेता अर्जेन्टिनाले कोन्मेबोल विश्वकप छनोटअन्तर्गत खेलमा चिल्लीमाथि स्पष्ट जित निकालेको छ ।
शुक्रवार विहान भएको खेलमा अर्जेन्टिनाले चिल्लीमाथि ३–० को स्पष्ट जित निकालेको हो ।
अर्जेन्टिनाको घरेलु मैदान मास मोनुमेन्टल रंगशालामा भएको खेलमा घरेलु टोलीलाई जिताउन एलेक्स म्याक अलिस्टेर, जुलियान अल्भारेज र पाउलो डिबालाले गोल गरे ।
पहिलो हाफ गोलरहित बराबरीमा सकिएको खेलमा दोस्रो हाफको ४८ औं मिनेटमा अल्भारेजको पासमा म्याक अलिस्टेरले गोल गर्दै घरेलु टोलीलाई सुरुवाती अग्रता दिलाए ।
त्यसपछि ८४ औं मिनेटमा जियोभानी लो सेल्सोको पासमा अल्भारेजले गोल थप्दा अर्जेन्टिना २–० ले अघि बढ्यो ।
यता, खेलको इन्जुरी समयको पहिलो मिनेटमा आलेहान्ड्रो ग्रानाचोको पासमा डिबालाले गोल गर्दा अर्जेन्टिना ३–० ले विजयी भयो ।
स्पष्ट जितसंगै अर्जेन्टिनाले लिग तालिकामा ७ खेलबाट १८ अंक जोड्दै तालिकाको शीर्ष स्थानमा कायमै रहेको छ ।
पराजित चिल्लीको भने समान ७ खेलमा ५ अंकसहित तालिकाको ९ औं स्थानमा झरेको छ ।
लेखक
