एजेन्सी । ब्राजिल कोन्मेबोल विश्वकप छनोटमा भेनेजुयलासंग बराबरीमा रोकिएको छ ।
शुक्रवार विहान भएको खेलमा बलियो ब्राजिल तुलनात्मक रुपमा कमजोर प्रतिद्वन्दी भेनेजुयलासंग १–१ को बराबरीमा रोकिएको छ ।
भेनेजुयलाको घरेलु मैदान इस्टाडियो मोनुमेन्टल दि माटुरिन रंगशालामा भएको खेलमा भिनिसियस जुनियरले प्राप्त पेनाल्टी चुकाउँदा ब्राजिल बराबरीमा रोकिन पुग्यो ।
पहिलो हाफको ४३ औं मिनेटमा राफिन्हाको गोलमार्फत् ब्राजिलले सुरुवाती अग्रता लियो ।
तर, दोस्रो हाफको ४६ औं मिनेटमा जेफरसन साभारिनोको पासमा टेलास्को सेगोभियाले घरेलु टोलीका लागि गोल फर्काउँदा खेल १–१ को बराबरीमा आयो ।
यता, ६२ औं मिनेटमा प्राप्त पेनाल्टीमा भिनिसियस गोल गर्न चुक्दा ब्राजिलले अग्रता लिने सुनौलो मौका गुमायो ।
त्यसपछि खेलमा थप गोल भएन ।
बराबरीसंगै ब्राजिलले ११ खेलबाट १७ अंक जोडेर छनोट तालिकाको तेस्रो स्थानमा उक्लेको छ ।
भेनेजुयलाको पनि समान ११ खेलमा १२ अंकसहित तालिकाको सातौं स्थानमा रहेको छ ।
लेखक
