एजेन्सी । छिमेकी राष्ट्र चीन एएफसी विश्वकप छनोटअन्तर्गत खेलमा साउदी अरबियासंग पराजित भएको छ ।
मंगलवार राति भएको एसियाली महादेशको विश्वकप छनोटअन्तर्गत तेस्रो चरणको खेलमा मित्र राष्ट्र चीन साउदी अरबियासंग अन्तिम केही समय सम्हालिन नसक्दा २–१ ले पराजित भएको हो ।
चीनको घरेलु मैदान डालियान सुयुवान फुटबल रंगशालामा भएको खेलमा १० खेलाडीमा समेतिएको भ्रमणकारी टोली साउदी अरबियाका लागि हस्सन काडिशले दुबै गोल गरे ।
त्यस्तै, भ्रमणकारी टोलीका अली लाजामीले घरेलु टोलीलाई एक आत्मघाती गोल उपहार दिए ।
खेल सुरु भएको १४ औं मिनेटमा लाजामीको आत्मघाती गोलको मद्दतमा चीनले सुरुवाती अग्रता लियो ।
यता, १९ औं मिनेटमा मोहम्मेद कानोले रातो कार्ड पाउँदा साउदी अरबिया १० खेलाडीमा समेतियो ।
तर, खेलको ३९ औं मिनेटमा नासेर अल डौसारीको पासमा काडिशले भ्रमणकारी टोलीका लागि गोल गर्दा खेल १–१ को बराबरीमा आयो ।
त्यसपछि खेलको अन्त्यतिर ९० औं मिनेटमा मुसब अल जुवायरको पासमा काडिसले दोस्रो गोल गर्दा साउदी अरबिया २–१ ले विजयी भयो ।
जितसंगै साउदी अरबियाले २ खेलमा ४ अंक जोडेर समूह ‘सी’ को शीर्ष स्थानमा उक्लेको छ ।
पराजित चीनले भने २ खेल खेलिसक्दा अंकको खाता खोल्न सकेको छैन ।
लेखक
