भक्तपुर । निधारित ९० र अतिरिक्त ३० मिनेटको खेल १–१ गोलको बराबरीमा सकिएपछि ट्राइबे्रकरमा क्रोएसियाले उपाधि दाबेदार ब्राजिललाई स्तब्ध पार्दै फिफा विश्वकपको अन्तिम चारमा प्रवेश गर्ने पहिलो राष्ट्र बनेको छ ।
पेनाल्टी सुटआउटमा क्रोएसियाले चार गोल गर्दा ब्राजिलले दुई पेनाल्टी गोल गर्न सक्यो ।
साविक उपविजेता क्रोएसियाका लागि निकोला भ्लासिक, लोभ्रो मजेर, लुका मोड्रिक र मिस्लाभ ओर्सिकले गोल गर्दा ब्राजिलका लागि क्यासिमेरो र पेड्रोले गोल गरे ।
रोड्रिगोको पेनाल्टी क्रोएसियाका गोलकिपर दोमिनिक लिभाकोभिकले बचाउँदा माक्विन्होसको प्रहार पोलमा लाग्दै बाहिरिएको थियो ।
यसअघि शुक्रवार राति भएको खेल निर्धारित ९० मिनेटको समय गोलरहित बराबरीमा सकिएपछि अतिरिक्त ३० मिनेट लम्बिएको थियो ।
विपक्षीमाथि निरन्तर दवाव सिर्जना गरेपनि उपाधि दाबेदार दक्षिण अमेरिकी राष्ट्रले गोलका लागि अतिरिक्त समयको १०५ औं मिनेटसम्म कुर्नुपरेको थियो ।
इड्युकेशन सिटी रंगशालामा निर्धारित ९० मिनेटको खेलमा ब्राजिलले क्रोएसियाको पोस्टमा १६ प्रहार गर्यो ।
जसमा ८ प्रहार टाग्रेटमा थियो । क्रोएसियाका गोलकिपर दोमिनिक लिभाकोभिकले ती सबै प्रहार निरन्तर रुपमा बिफल पार्दै गए । जसले गर्दा निर्धारित समय गोलरहित बराबरीमा रोकिन पुग्यो ।
यता, खेलको अधिकांश समय रक्षात्मक खेलेको क्रोएसियाले काउन्टरमा केहि मौका सिर्जना गर्ने प्रयास गरेता पनि एक सट पनि टाग्रेटमा पार्न सकेन ।
ब्राजिलका कप्तान समेत रहेका नेइमारले लुकास पक्वेइटासंग आकर्षक वान टु वान मूव सिर्जना गर्दै विपक्षी गोलकिपरलाई विट गर्दै आकर्षक गोल गर्दै ब्राजिललाई १–० को अग्रता दिलाएका थिए ।
तर, क्रोएसियाले अन्त्यतिर गोल फर्काउदा खेल नाटकिय रुपमा ट्राइब्रेकरमा पुगेको थियो । ११६ औं मिनेटमा ब्रनो पेटकोभिकले गोल गर्दा खेल १–१ को बराबरीमा टुंगियो ।
योसंगै खेलको निर्णय पेनाल्टी सुटआउटमार्फत भयो । जसमा युरोपेली राष्ट्र क्रोएसियाले ब्राजिललाई सनसनी रुपमा पराजित गर्यो ।
यसअघि पनि प्रि–क्वाटरफाइनल खेलमा क्रोएसियाले जापानमाथि पेनाल्टी सुटआउटमा जित हात पारेको थियो ।
लेखक
