एजेन्सी । इंग्लिस प्रिमियर लिगमा म्यानचेस्टर युनाइटेडले लेस्टरसिटीविरुद्व सहज जित हात पारेको छ ।
आइतवार राति भएको खेलमा घरेलु टोली म्यानचेस्टर युनाइटेडले लेस्टरसिटीमाथि ३–० को जित हात पारेको हो ।
ओल्डट्राफेड रंगशालामा भएको खेलमा युनाइटेडका लागि मार्कुस रासफोर्डले २ गोल गर्दा जोडन सान्चोले अर्को १ गोल थपे ।
खेलको २५ औं मिनेटमा जारी सिजन उच्च लयमा रहेको रासफोर्डले गोल गर्दै युनाइटेडले सुरुवाती अग्रता लिएको थियो । रासफोर्डका लागि ब्रुनो फर्नान्डेजले गोलका लागि पास उपलब्ध गराएका थिए ।
पहिलो हाफ १–० ले अघि रहेको युनाइटेडले दोस्रो हाफमा थप २ गोल गर्यो । खेलको ५६ औं मिनेटमा फ्रेडको असिस्टमा रासफोर्डले गोल थप्दा युनाइटेड २–० ले अघि बढ्यो । रासफोर्डको उक्त गोल जारी सिजनको २४ औं गोल समेत रह्यो ।
त्यसपछि पनि निरन्तर आक्रमण बुनिरहेको युनाइटेडले ६१ औं मिनेटमा फर्नान्डेजको असिस्टमा जोर्डन सान्चोले गोल गर्दै युनाइटेडलाई ३–० को जित दिलाए ।
लेस्टरविरुद्व जित हात पारेसंगै युनाइटेडले २४ प्रिमियर लिग खेलमा ४९ अंक जोडेको छ । युनाइटेड लिग तालिकाको तेस्रो स्थानमा छ ।
पराजित भ्रमणकारी टोलीको २३ खेलमा २४ अंक छ । लेस्टर तालिकाको १४ औं स्थानमा झरेको छ ।
लेखक
