भक्तपुर । नेपाल टि–२० क्रिकेट लिगअन्तर्गत दोस्रो खेलमा लुम्बिनी अल स्टार्सले फार वेस्ट युनाइटेडलाई पराजित गर्दै प्रतियोगितामा विजयी सुरुवात गरेको छ ।
लुम्बिनीले फार वेस्टमाथि ६७ रनको विजय हात पारेको हो ।
काठमाडौंस्थित टियू क्रिकेट मैदानमा भएको खेलमा लुम्बिनीले दिएको १ सय ५३ रनको लक्ष्य पछ्याउनेक्रममा फार वेस्टर्न १६.२ बलमा अलआउट हुँदै ८५ रनमा समेटियो ।
फार वेस्टका लागि कप्तान हशमतुल्लाह शाहिदीले ४४ बलमा २ चौकासहित सर्वाधिक ३५ रनको योगदान दिए ।
विनोद भण्डारी ११ बल खेल्दै १ छक्कासहित १३ रन बनाउँदा अन्य कुनैपनि खेलाडीले दोहोरो अंकमा रन बनाउन सकेनन् ।
फार वेस्टका देव खनाल ९, उमेर अली ४, भीम सार्की ३, बसन्त कार्की २, राशिद खान र करण केसी १ रनमा आउट भए । त्यस्तै, हरिशंकर शाह विना कुनै रन आउट भए ।
लुम्बिनीका दीपेन्द्रसिंह ऐरीले ३ विकेट लिए । सागर ढकालले २ विकेट हात पार्दा प्याट ब्राउन, किशोर महतो र विपुल शर्माले १–१ विकेट आ–आफ्नो नाममा पारे ।
त्यसअघि टस जितेर पहिला ब्याटिङमा उत्रिएको लम्बिनीले निर्धारित २० ओभरको खेलमा ६ विकेट गुमाएर १५२ रन बनाएको थियो ।
लुम्बिनीका लाहिरु मिलाल्थाले सर्वाधिक ६० रनको अर्धशतिकिय इंनिङ्स खेले । त्यस्तै, दिपेन्द्र सिंह ऐरीले ३५ रनको योगदान गरे । गुल्शन झा २५ रनमा अविजित रहे ।
यता, विपुल शर्माले १२ रन बनाउँदा कुशल भुर्तेलले ७ रनको योगदान दिए । उन्मक्त चन्दले २ रन बनाउँदा अनिल साह भने शुन्य रनमा पेविलियन फर्कए । योगेन्द्र सिह कार्की १ रन बनाउँदै अविजित रहे ।
फार वेस्टर्नका लागि उमर अलि र करन केसीले ३–३ विकेट लिए ।
प्रतियोगिताअन्तर्गत भोली (आइतवार) पनि दुई खेल हुनेछ । भोलि पहिलो खेलमा विराटनगर सुपरकिङ्स र लुम्बिनी अल स्टार्स भिड्ने छ । दोस्रो खेलमा पोखरा एभेन्जर्स र जनकपुर रोयल्स खेल्नेछ ।
लेखक
