भक्तपुर । आईसीसी क्रिकेट विश्वकप लिग २ मा अन्तर्गत अमेरिका सिरिजको पहिलो खेलमा नेपाल पराजित भएको छ ।
आईतवार राति भएको खेलमा नेपाल घरेलु टोली संयुक्त राज्य अमेरिकासंग ३ विकेटले पराजित भएको हो ।
टेक्सासको ग्रान्ड प्रेरी क्रिकेट रंगशालामा भएको खेलमा २८७ रनको विजयी लक्ष्यका साथ जवाफी ब्याटिङमा उत्रिएको अमेरिकाले ४९.४ ओभरमा ७ विकेट गुमाउँदै २९१ रन जोड्यो ।
अमेरिकालाई जिताउन शयान जाहानगिरले ९७ बलमा १२ चौका र ४ छक्का प्रहार गर्दै १०४ रनको शतकिय पारी खेल्दा कप्तान तथा विकेटकिपर मोनाङ्क पटेलले ७६ बल खेल्नेक्रममा ५ चौका प्रहार गर्दै ६२ रनको अर्धशतकिय पारी खेले ।
त्यस्तै, हरमित सिंहले ४४ बलमा ६ चौका र २ छक्का प्रहार गर्दै ५७ रनको अर्धशतकिय पारी खेल्दा शाड्ले भान स्चालक्वेकले ३७ बल खेल्दै १ चौका र १ छक्का प्रहार गर्दै २९ रन जोडेर अविजित रहे ।
यता, सैतेजा मुक्कामल्लाले १९ बलमा ११ रन जोडेर आउट हुँदा मिलिन्ड कुमार ५, ओपनर ब्याट्सम्यान एन्ड्रेस गौस १ र सञ्जय कृष्णा मुर्ति शुन्य रनमा पेविलियन फर्किए ।
अमेरिकाले अतिरिक्त रुपमा ११ रन जोड्यो ।
नेपालका लागि कुशल भुर्तेलले सर्वाधिक ४ विकेट लिँदा सोमपाल कामीले २ र ललित राजबंशीले १ विकेट लिए ।
त्यसअघि टस हारेर पहिला ब्याटिङमा उत्रिएको नेपालले निर्धारित ५० ओभरको खेल खेल्नेक्रममा अलआउट हुँदै २८६ रन जोड्यो ।
नेपालका लागि कप्तान रोहित पौडेलले ७५ बलमा ८ चौका र ३ छक्का प्रहार गर्दै ९६ रनको शतक नजिक पुगेर आउट हुँदा ओपनर ब्याट्सम्यान अनिल साहले ६२ बल खेल्नेक्रममा ५ चौका प्रहार गर्दै ५६ रनको अर्धशतकिय पारी खेल्दै पेविलियन फर्किए ।
त्यस्तै, अर्का ओपनर तथा विकेटकिपर आसिफ शेखले ५३ बलमा ७ चौका र १ छक्का प्रहार गर्दै ५२ रनको अर्धशतकिय पारी खेल्दा आरिफ शेखले ४५ बल खेल्नेक्रममा २ चौका र १ छक्का प्रहार गरेर ३७ रन जोड्दै पेविलियन फर्किए ।
यता, दिपेन्द्र सिंह ऐरीले १७ बलमा १३ रन जोडेदै आउट हुँदा कुशल भुर्तेलले २८ बलको सामना गर्दै ११ रन जोडेर पेविलियन फर्किए ।
सन्दिप लामिछाने ५, करण केसी ३ र सोमपाल कामी २ रनमा आउट हुँदा ललित राजबंशी १ रनमा अविजित रहे ।
नेपालले अतिरिक्त रुपमा ९ रन जोड्यो ।
घरेलु टोली अमेरिकाका लागि नोस्थुस केन्जीजेले ४ विकेट लिँदा सौरब नेत्रभल्करले २, शाड्ले भान स्चालक्वेक, जेसी सिंह र हरमित सिंहले १–१ विकेट लिए ।
लेखक
