भक्तपुर । इंग्लिस प्रिमियर लिगमा ब्राइटनमाथि जित निकाल्दै आर्सनलले उपाधि होडमा ७ अंकको स्पष्ट अग्रता लिएको छ ।
सनिवार राति भएको खेलमा आर्सनलले ब्राइटनमाथि ४–२ को जित हात पारेको हो ।
आर्सनलका लागि बुकायो साका, मार्टिन ओडिगार्ड, इडवार्ड केटिह र ग्रावियल मार्टिनेलीले गोल गरे । यता, ब्राइटनका लागि कौरु मितोमा र इभान फर्गुसनले एक–एक गोल गरे ।
एमेक्स रंगशालामा खेलको दोस्रो मिनेटमा साकाको गोलमार्फत आर्सनलले सुरुवाती अग्रता लिएको थियो । त्यसपछि ओडिगार्डले ३९ औं मिनेटमा गोल गर्दै पहिलो हाफमा आर्सनललाई २–० ले अघि बढाएका थिए ।
दोस्रो हाफको ४७ औं मिनेटमा केटिहले गोल गर्दा आर्सनल ३–० को आरामदायी अवस्थामा पुगेको थियो । त्यसपछि घरेलु टोलीका लागि मितोमाले ६५ औं मिनेटमा गोल फर्काउदै खेल ३–१ को अवस्थामा पुग्यो ।
त्यसको ६ मिनेटपछि नै मार्टिनेलीले गोल गर्दा आर्सनल ४–१ ले अघि बढ्यो । ७७ औं मिनेटमा फर्गुसनले गोल गरे तापनि ब्राइटनको हार टरेन र खेल ४–२ ले आर्सनलले जित्यो ।
जितसंगै १६ खेलमा ४३ अंक जोडेको आर्सनलले दोस्रो स्थानमा रहेको साविक विजेतन म्यानचेस्टर सिटीलाई ७ अंकले पछि पारेको छ ।
यता, पराजित ब्राइटनको समान खेलमा २४ अंक छ र तालिकाको आठौं स्थानमा छ ।
लेखक
