एजेन्सी । स्पेनिस ला लिगामा भिल्लारियलले सेभिल्लामाथि जित हासिल गरेको छ ।
शुक्रवार राति भएको खेलमा भिल्लारियलले सेभिल्लामाथि २–१ को जित निकालेको हो ।
सेभिल्लाको घरेलु मैदान रामोन सान्चेज पिजुआन रंगशालामा भएको खेलमा भ्रमणकारी टोलीलाई जिताउन अर्नौट डान्जुमा र अयोजे पेरेजले समान एक–एक गोल गरे ।
पराजित घरेलु टोलीका लागि भने डोडी लुकेबाकियोेले एक गोल फर्काए ।
खेल सुरु भएको दोस्रो मिनेटमै एलेक्स बेइनाको पासमा डान्जुमाले गोल गर्दै भिल्लारियललाई सुरुवाती अग्रता दिलाए ।
यता, ९ औं मिनेटमा घरेलु टोलीका लागि जुवानलु सान्चेजले गोल गरेतापनि भिएआरले मान्यता नदिँदा खेलमा फर्किन सकेन ।
तर, पहिलो हाफको इन्जुरी समयको छैटौं मिनेटमा लुकास ओकाम्पोसको पासमा लुकेबाकियोले सेभिल्लाका लागि गोल फर्काउँदा खेल १–१ को बराबरीमा आयो ।
यता, दोस्रो हाफको ७० औं मिनेटमा भिल्लारियलका सान्ती कोमेसानाको गोललाई पनि भिएआरले मान्यता दिएन ।
त्यसपछि खेलको अन्तिम समयतिर इन्जुरी समयको पाँचौं मिनेटमा पेरेजले गोल गर्दा भिल्लारियल २–१ ले विजयी भयो ।
सिजनमा दुई खेलमा पहिलो जित निकालेसंगै भिल्लारियलले ४ अंक जोड्दै लिग तालिकाको दोस्रो स्थानमा उक्लिएको छ ।
सेभिल्लाको भने समान दुई खेलमा एक अंक रहेको छ ।
लेखक
