एजेन्सी । स्पेनिस महारथी रियल मड्रिडले ला लिगाअन्तर्गत खेलमा रियल भाल्लाडोलिडमाथि स्पष्ट जित निकालेको छ ।
आईतवार राति भएको खेलमा साविक विजेतासमेत रहेको रियल मड्रिडले तुलनात्मक रुपमा कमजोर प्रतिद्वन्दी रियल भाल्लाडोलिडमाथि ३–० को स्पष्ट जित निकालेको हो ।
मड्रिडको घरेलु मैदान स्यान्टियागो बेर्नाबाउ रंगशालामा भएको खेलमा घरेलु टोलीलाई जिताउन फेडरिको भालभार्डे, ब्राहिम डाइज र इनड्रिकले समान एक–एक गोल गरे ।
पहिलो हाफ गोलरहित बराबरीमा सकिएको खेलमा दोस्रो हाफको ५० औं मिनेटमा रोड्रिगोको पासमा भालभार्डेले गोल गर्दै मड्रिडलाई सुरुवाती अग्रता दिलाए ।
त्यसपछि ८८ औं मिनेटमा इडर मिलिटाओको पासमा डाइजले गोल थप्दा स्पेनिस महारथी टोली २–० ले अघि बढ्यो ।
यता, इन्जुरी समयको छैटौं मिनेटमा युवा खेलाडी इनड्रिकले गोल थप्दा मड्रिड ३–० ले विजयी भयो ।
जारी सिजनको ला लिगामा दोस्रो खेलमा आएर मड्रिडले जित निकाल्न सफल भयो ।
त्यसअघि पहिलो खेलमा मड्रिड बराबरीमा रोकिएको थियो ।
योसंगै मड्रिडले दुई खेलबाट चार अंक जोडेर लिग तालिकाको चौथौं स्थानमा उक्लिएको छ ।
पराजित टोलीको भने दुई खेलमा तीन अंक रहेको छ ।
लेखक
