एजेन्सी । स्पेनिस महारथी रियल मड्रिडले ला लिगाअन्तर्गत खेलमा ग्रानाडामाथि फराकिलो जित हासिल गरेको छ ।
सनिवार राति भएको खेलमा रियल मड्रिडले तुलनात्मक रुपमा कमजोर प्रतिद्वन्दी ग्रानडामाथि ४–० को फराकिलो जित हासिल गरेको हो ।
ग्रानाडाको घरेलु मैदान नुएभो लोस कारमेनेस रंगशालामा भएको खेलमा मड्रिडको जितमा ब्राहिम डाइजले दुई गोल गर्दा फरान गार्सिया र अर्डा गुलेरले एक–एक गोल गरे ।
पहिलो हाफको ३८ औं मिनेटमा गार्सियाले गोल गर्दै भ्रमणकारी टोलीलाई सुरुवाती अग्रता दिलाए ।
त्यसपछि पहिलो हाफको इन्जुरी समयको दोस्रो मिनेटमा गार्सियाको पासमा गुलेरले गोल थप्दा मड्रिड पहिलो हाफसम्ममा २–० ले अघि बढ्यो ।
यता, दोस्रो हाफको ४९ औं मिनेटमा डानी सेबालोसको पासमा डाइजले गोल थप्दा मड्रिड ३–० ले अघि बढ्यो ।
त्यस्तै, ५८ औं मिनेटमा लुका मोड्रिचको पासमा डाइजले व्यक्तिगत रुपमा दोस्रो गोल थप्दा मड्रिड ४–० ले विजयी भयो ।
फराकिलो जितसंगै यसअघि नै लिग जितिसकेको मड्रिडले ३५ खेलबाट ९० अंक जोडेको छ ।
ग्रानाडाको भने समान ३५ खेलमा २१ अंकसहित तालिकाको १९ औं स्थानमा रहेको छ ।
पराजयसंगै ग्रानडा जारी सिजनबाट रेलिगेशनमा पर्ने निश्चित भएको छ ।
लेखक
