एजेन्सी । स्पेनिस महारथी बार्सिलोनाले ला लिगाअन्तर्गत खेलमा गेटाफेमाथि फराकिलो जित हासिल गरेको छ ।
सनिवार राति भएको खेलमा साविक विजेता समेत रहेको बार्सिलोनाले तुलनात्मक रुपमा कमजोर प्रतिद्वन्दी गेटाफेमाथि ४–० को फराकिलो जित हासिल गरेको हो ।
क्याटलान क्लबको घरेलु मैदान इस्टाडी ओलम्पिक लुइस कम्पनिज रंगशालामा भएको खेलमा घरेलु टोलीको जितमा राफिन्हा, जाओ फेलेक्स, फ्राङ्की डि जोङ र फेरमिनले गोल गरे ।
खेल सुरु भएको पहिलो हाफको २० औं मिनेटमा जुलेस कौन्डेको पासमा राफिन्हाले गोल गर्दै घरेलु टोलीलाई सुरुवाती अग्रता दिलाए ।
त्यसपछि दोस्रो हाफको ५३ औं मिनेटमा एन्ड्रेस क्रिस्टियन्सनको पासमा जाओ फेलेक्सले गोल थप्दा बार्सिलोना २–० ले अघि बढ्यो ।
त्यस्तै, ६१ औं मिनेटमा रोफिन्हाको असिस्टमा फ्राङ्की डि जोङले गोल थप्दा क्याटलान क्लब ३–० को आरामदायी अग्रता सहित अघि बढ्यो ।
यता, खेलको अन्त्यतिर इन्जुरी समयको पहिलो मिनेटमा फेरमेनले गोल थप्दा बार्सिलोना ४–० ले विजयी भयो ।
एकपक्षिय फराकिलो जितसंगै बार्सिलोनाले २६ खेलमा ५७ अंक जोड्दै लिग तालिकामा दोस्रो स्थानमा उक्लेको छ ।
पराजित भ्रमणकारी टोलीको समान २६ खेलमा ३४ अंक रहेको छ । गेटाफे तालिकाको १० औं स्थानमा रहेको छ ।
सनिवार राति नै भएको अन्य ला लिगा खेलहरुमा एट्लेटिको डि मड्रिड तुलनात्मक रुपमा कमजोर प्रतिद्वन्दी अल्मारियासंग २–२ को बराबरीमा रोकिँदा अलाभेस र माल्लोर्काले पनि १–१ गोलको बराबरी खेलेका छन् ।
लेखक
