एजेन्सी । पहिलो संस्करणको फ्रेन्चाइज क्रिकेट लिग मेजर लिग क्रिकेट (एमएलसी) अन्तर्गत दोस्रो चरणको खेलमा एमआई न्युयोर्कले लस एन्जलस नाइट राइडर्सलाई फराकिलो रनअन्तरले पराजित गरेको छ ।
सोमवार विहान भएको खेलमा एमआई न्युयोर्कले लस एन्जलस नाइट राइडर्सलाई १०५ रनको फराकिलो रनअन्तरले पराजित गरेको हो ।
अमेरिकास्थित ग्रान्ड प्रेरी रंगशालामा भएको खेलमा १५६ रनको मध्यम विजयी लक्ष्य पछ्याएको लस एन्जलसलाई १३.५ ओभरमा मात्र ५० रनमा अलआउट गर्दै न्युयोर्कले फराकिलो रनअन्तरको जित हात पार्यो ।
महत्वपूर्ण जितसंगै न्युर्योकले २ खेलमा २ अंक जोड्दै तालिकाको दोस्रो स्थानमा उक्लेको छ । राम्रो रननेटका आधारमा न्युयोर्क दोस्रो स्थान उक्लिएको हो ।
पराजित लस एन्जलसले खेलेको दुबै खेलमा हार बेर्होदै तालिकाको पुच्छारमा रहेको छ ।
लस एन्जलसका लागि उन्मुक्त चन्दले २६ बलमा २ चौका र १ छक्का प्रहार गर्दै २६ रन जोड्नुका अलावा अन्य कुनैपनि ब्याट्सम्यानले दोहोरो अंकमा रन जोड्न सकेनन् ।
एडम जाम्पा ६ रनमा अविजित रहँदा विकेटकिपर जसकरण मल्होत्रा ५, अली खान ४, कप्तान सुनिल नारिने, आन्द्रे रसेल, रिले रोस्सोउ समान २–२ रन बनाउँदै आउट हुँदा लस एन्जलसका ३ ब्याटर शुन्य रनमा पेविलियन फर्किए ।
लस एन्जलसले अतिरिक्त रुपमा ३ रन जोड्यो ।
लस एन्जलसका ब्याट्सम्यानहरुलाई कसिलो बलिङ गर्दै धराशायी बनाउन न्युयोर्कका लागि कप्तान केइरन पोलाल्डले २ ओभर बलिङ गर्दै ९ रन दिएर २ विकेट लिँदा इसान अदिलले ३ ओभर बलिङ गर्दै ७ रन दिएर २ विकेट लिए ।
त्यस्तै, नोस्थुश केन्जिगेले ३ ओभर बलिङ गर्दै मात्र ७ रन दिएर २ विकेट लिँदा ट्रेन्ट बोल्डले २.५ ओभर बलिङ गर्दै १० रन दिएर २ विकेट लिए ।
यता, कागिसो राबदाले ३ ओभर बलिङ गर्नेक्रममा १ मेडन राख्दै १६ रन खर्चिएर २ विकेट हात पारे ।
त्यसअघि टस जितेर पहिला ब्याटिङमा उत्रिएको न्युयोर्कले निर्धारित २० ओभरको खेलमा ८ विकेट गुमाउँदै १५५ रन बनाएको थियो ।
न्युयोर्कका लागि टिम डेभिडले २१ बलमा ४ चौका र ४ छक्का प्रहार गर्दै सर्वाधिक ४८ रन जोड्दै अविजित पारी खेल्दा विकेटकिपर निकोलास पुरनले ३७ बल खेल्दै १ चौका र २ छक्का प्रहार गर्दै ३८ रन बनाए ।
त्यस्तै, देवाल्ड ब्रेभिसले ७ बलमा २ चौका र १ छक्का प्रहार गर्दै १५ रन जोड्दै पेविलियन फर्किदा हम्माद अजामले ८, कप्तान केइरन पोलाल्डले ५, मोनाङ्क पटेल र शयान जाहाङ्गिरले समान ४–४, नोस्थुश केन्जिगेले २ तथा कागिसो राबदाले १ रन बनाउँदै आउट भए ।
ट्रेन्ट बोल्ड भने ७ रनमा अविजित रहे । न्युयोर्कले अतिरिक्त रुपमा २३ रन जोड्यो ।
लस एन्जलसका लागि अली खानले ४ ओभर बलिङ गर्दा २८ रन दिएर २ विकेट लिँदा कोर्न ड्रायले २ ओभर बलिङ गर्नेक्रममा १० रन दिएर २ विकेट हात पारे ।
त्यस्तै, एडम जाम्पाले ४ ओभर बलिङ गर्नेक्रममा २५ रन दिएर २ विकेट लिँदा लोकी फर्गुसनले ४ ओभर बलिङ गर्दै ३७ रन खर्चिएर १ विकेट लिए ।
त्यसअघि सोमवार विहानै सम्पन्न पहिलो खेलमा बासिङ्टन फ्रिडमले टेक्सास सुपर किङ्ग्समाथि रोमाञ्चक ६ रनको जित हात पार्यो ।
लेखक
