एजेन्सी । टोटनहम हटस्पर युईएफए युरोपा लिगमा रोमासंग बराबरीमा रोकिएको छ ।
विहिवार राति भएको खेलमा इंग्लिस क्लब टोटनहम हटस्पर अन्तिम समयमा सम्हालिन नसक्दा इटालियन क्लब रोमासंग २–२ को बराबरीमा रोकिएको हो ।
इंग्लिस क्लबको घरेलु मैदान टोटनहम हटस्पर रंगशालामा भएको खेलमा घरेलु टोलीका लागि सन ह्युङ मिन र ब्रेनान जोनसनले गोल गरे ।
भ्रमणकारी टोलीका लागि भने इभान एनडिका र म्याट्स हुम्मेल्सले गोल फर्काए ।
खेल सुरु भएको पाँचौं मिनेटमा सनले पेनाल्टीमा गोल गर्दै घरेलु टोलीलाई सुरुवाती अग्रता दिलाए ।
तर, २० औं मिनेटमा पाब्लो डिबालाको पासमा इभानले भ्रमणकारी टोलीका लागि गोल गर्दा खेल १–१ को बराबरीमा आयो ।
त्यस्तै, ३३ औं मिनेटमा डिजेन कुलुसेभ्स्कीको पासमा जोनसनले गोल गर्दा इंग्लिस क्लब २–१ ले अघि बढ्यो ।
यता, खेलको अन्त्यतिर इन्जुरी समयको पहिलो मिनेटमा एन्जेलिनोको पासमा हुम्मेल्सले इटालियन क्लबका लागि गोल फर्काउँदा खेल २–२ को बराबरीमा सकियो ।
बराबरीसंगै दुबै टोलीले अंक बाँडेका छन् ।
टोटनहमले ५ खेलबाट १० अंक जोडेर लिग तालिकाको ९ औं स्थानमा रहँदा समान ५ खेल खेलेको रोमाले ६ अंक जोड्दै तालिकाको २१ औं स्थानमा रहेको छ ।
लेखक
