भक्तपुर । काठमाडौंमा जारी नेपाल टि–२० क्रिकेट लिगको छैटौं खेलमा जनकपुर रोयल्सले विराटनगर सुपरकिंग्सविरुद्व रोमाञ्चक ५ विकेटको जित हात पारेको छ ।
अन्तिम २ बलमा जनकपुरलाई जितका लागि ६ रन आवश्यक हुँदा पहिलो बलमा चाडविक वाल्टनले चौका प्रहार गरे ।
अन्तिम बलमा २ रनको जित आवश्यक रहँदा रोमाञ्चक रुपमा वाल्टन र आदिल आलमको जोडीले पुरा गर्दै खेल जनकपुरले ५ विकेटले जित्यो ।
काठमाडौंस्थित टियू क्रिकेट मैदानमा जितको लागि १ सय ४१ रनको विजयी लक्ष्य पछ्याएको जनकपुरले निर्धारित २० ओभरमा ५ विकेट गुमाउँदै पूरा गर्यो ।
वाल्टन ५५ बलमा ५ चौका र ४ छक्कासहित सर्वाधिक ६९ रनमा अविजित रहे । आलम ६ बलमा १ छक्कासहित १० रनमा अविजित रहे ।
त्यस्तै, शरफुदिन असरफले २३ रन बनाउँदा अन्य ब्याटरले दोहोरो अंकमा रन बनाउँन सकेनन् । विराटनगरका लागि नन्दन यादव,हुसेन तलात र रिजन ढकालले समान १–१ विकेट लिए ।
त्यसअघि क्रितिपूरस्थित टियू क्रिकेट मैदानमा पहिला ब्याटिङ गरेको विराटनगरले १९.५ ओभरमा अलआउट हँदै १ सय ४० रन बनाएको थियो ।
विराटनगरका लागि सिकन्दर राजाले सर्वाधिक ३८ रन जोडे । त्यस्तै, रोहित कुमार पौडेलले ३२ रनको योगदान दिँदा हुसेन तलातले २८ रन जोडे । यता, अर्जुन साउदले पनि १८ रन बनाए ।
जनकपुरका लागि ललित नारायण राजवंशीले सर्वाधिक ५ विकेट लिए । त्यस्तै, आदिल आलम र केसरिक विलियम्सले समान २–२ विकेट लिँदा सोमपाल कामीले पनि १ विकेट आफ्नो नाममा पारे ।
लिगअन्तर्गत भोली पहिलो खेलमा पोखरा एभेन्जर र लुम्बिनी अल स्टार्सबीच खेल हुनेछ । त्यस्तै, दोस्रो खेलमा काठमाडौं नाइट्स र जनकपुर रोयल्स आमनेसामने हुँदैछन् ।
लेखक
