भक्तपुर । नेपालले एसीसी पुरुष यु–१९ प्रिमियर कपअन्तर्गत समूह चरणको पहिलो खेलमा इरानलाई फराकिलो रनअन्तरले पराजित गरेको छ ।
विहिवार मलेसियामा भएको खेलमा नेपालले तुलनात्मक रुपमा कमजोर प्रतिद्वन्दी इरानलाई २७४ रनको फराकिलो रनअन्तरले पराजित गरेको हो ।
मलेसियाको बाङ्गीस्थित वाईएसडी युकेएम ओभलमा भएको खेलमा नेपालले प्रस्तुत गरेको ३५४ रनको विशाल विजयी लक्ष्य पछ्याउन जवाफी ब्याटिङमा उत्रिएको इरान ३०.५ ओभरमा अलआउट हुँदा मात्र ७९ रनमा समेतियो ।
इरानका लागि विकेटकिपर अमेर खोर्सान्दले २२ बलमा १ चौका र ५ छक्का प्रहार गर्दै ३७ रन जोडेर पेविलियन फर्किदा सबेर इब्राहिमीपौरले ४३ बलको सामना गर्दा १ चौका प्रहार गर्दै ११ रनमा अविजित रहे ।
इरानका अन्य कुनैपनि ब्याट्सम्यानले दोहोरो अंकमा रन जोड्न सकेनन् ।
कप्तान दादरहमान रेइसी र समान शेखी समान ५–५, हान्जालेहा देराख्शान्देह ४, जैद रेइसी ३, सलिम ताल र अर्शलान शेखी समान २–२ र सलमान नियाज्मण्ड १ रन जोड्दै आउट भए ।
इरानका अन्य दुई ब्याट्सम्यान शुन्य रनमा पेविलियन फर्किए । इरानले अतिरित्तः रुपमा ९ रन जोड्यो ।
इरानलाई सस्तैमा समेत्न नेपालका लागि सुवास भण्डारी र दिपेश कँडेलले समान ३–३ विकेट लिँदा हेमन्त धामी र आकाश चन्दले समान २–२ विकेट हात पारे ।
त्यसअघि टस हारेर पहिला ब्याटिङमा उत्रएको नेपालले ४०.१ ओभरमा अलआउट हुँदै ३५३ रन जोड्यो ।
नेपालका लागि कप्तान देव खनालले ६० बलमा १२ चौका र ४ छक्का प्रहार गर्दै सर्वाधिक १०० रनको शतकिय पारी खेल्दा विकेटकिपर दिपक प्रसाद दुम्रेले ४४ बल खेल्नेक्रममा ८ चौका र २ छक्का प्रहार गर्दै ६९ रनको अर्धशतकिय पारी खेल्दै आउट भए ।
त्यस्तै, दिपक बोहराले ५९ बलमा ५ चौका र २ छक्का प्रहार गर्दै ६५ रनको अर्धशतकिय इनिङ्स खेल्दै पेविलियन फर्किदा दिपेस कँडेलले २२ बल खेल्दै ३ चौका र १ चौका प्रहार गर्दै २९ रन जोडेर आउट भए ।
यता, हेमन्त धामीले १९ बलमा २ चौका र १ छक्का प्रहार गर्दै २३ रन जोड्दै आउट हुँदा आकाश चन्दले ११ बलमा ३ चौका प्रहार गर्दै १९ रन जोड्दै पेविलियन फर्किए ।
त्यस्तै, सुवास भण्डारीले १६ बलमा २ चौका प्रहार गर्दै १८ रन जोड्दै अविजित रहँदा आकाश त्रिपाठी ३ र दिपक बोहरा १ रनमा आउट भए ।
अर्जुन कुमाल र मिलन बोहरा शुन्य रनमा पेविलियन फर्किए । नेपालले अतिरिक्त रुपमा २६ रन जोड्यो ।
इरानका लागि दादरहमान रेइसी र सलमान नियाज्मण्डले समान ३–३ विकेट लिँदा जैद रेइसी र समान शेखीले समान २–२ विकेट लिए ।
प्रतियोगिताअन्तर्गत नेपालले असोज २८ गते आईतवार समूह चरणको दोस्रो खेलमा बहराइनसंग खेल्नेछ ।
लेखक
