भक्तपुर । नेपाल १७ वर्षमुनीको एएफसी एसियन कप छनोटबाट बाहिरिएको छ ।
शुक्रवार राति भएको छनोटअन्तर्गत खेलमा नेपाल कतारसंग ५–० को फराकिलो अन्तरले पराजित भएसंगै यु–१७ एसियन कप छनोटबाट बाहिरिएको हो ।
कतारको दोहास्थित अस्पेर एकेडेमी पिचमा भएको घरेलु टोली कतारका लागि फैसलले ह्याट्रिक हान्दा हानी मोहम्मेद र अल मारजौकीले एक–एक गोल गरे ।
पहिलो हाफको २१ औं मिनेटमा हानीले गोल गर्दै घरेलु टोलीलाई सुरुवाती अग्रता दिलाए ।
त्यसपछि पहिलो हाफको अन्त्यतिर ४५ औं मिनेटमा फैसलले गोल गर्दै कतारलाई २–० ले अघि बढायो ।
दोस्रो हाफको ५६ र ८२ औं मिनेटमा फैसलले गोल थप्दै व्यक्तिगत रुपमा ह्याट्रिक पूरा गर्दा घरेलु टोली ४–० ले अघि बढ्यो ।
यता, ८६ औं मिनेटमा मारजौकीले गोल थप्दा कतार ५–० ले विजयी भयो ।
खेल अवधिभर नै दवाव खेपेको नेपालले फराकिलो हार बेहोरेसंगै एक खेल अगावै नेपाल छनोट चरणबाट बाहिरिने पक्का भयो ।
यसअघि पनि नेपाल बलियो टोली जापानसंग ९–२ को फराकिलो गोलअन्तरले पराजित भएको थियो ।
समूह ‘एफ’ मा रहेको नेपालले २ खेल खेलिसक्दा अंकको खाता नै खोल्न सकेको छैन ।
यो समूहमा जापान र कतारले समान दुई–दुई खेलमा शतप्रतिशत जितका साथ ६ अंक जोडेको छ ।
अब नेपालले छनोटअन्तर्गत अन्तिम खेल आईतवार मंगोलियासंग खेल्नेछ ।
लेखक
