एजेन्सी । स्विजरल्याण्डले युरोपेली फुटबलको लोकप्रिय प्रतियोगिता युईएफए युरोपियन फुटबल च्याम्पियनसिप (युरो कप) मा विजयी सुरुवात गरेको छ ।
सनिवार राति भएको खेलमा हंगेरीमाथि ३–१ को सहज जित निकाल्दै स्विजरल्याण्डले युरो कपमा विजयी सुरुवात गरेको हो ।
जर्मनीको कोलोग्नेस्थित कोलोग्ने रंगशालामा भएको खेलमा स्विजरल्याण्डलाई जिताउन क्वाडव डुआ, माइकल एबिस्चेर र ब्रिल इम्बोलोले गोल गर्दा पराजित टोलीका लागि बर्नाबास भर्गाले एक गोल फर्काए ।
खेल सुरु भएको १२ औं मिनेटमा एबिस्चेरको पासमा डुआले गोल गर्दै स्विजरल्याण्डलाई सुरुवाती अग्रता दिलाए ।
त्यसपछि पहिलो हाफको अन्त्यतिर ४५ औं मिनेटमा रेमो फ्रेउलेरको असिस्टमा एबिस्चेरले गोल थप्दा स्विजरल्याण्ड २–० ले अघि बढ्यो ।
तर, दोस्रो हाफको ६६ औं मिनेटमा हंगेरीका लागि डोमिनिक स्जोबोसलाईको असिस्टमा भर्गाले गोल फर्काउँदा खेल २–१ को स्थितिमा आयो ।
यता, खेलको अन्त्यतिर इन्जुरी समयको तेस्रो मिनेटमा इम्बोलोले गोल थप्दा स्विजरल्याण्ड ३–१ ले विजयी भयो ।
महत्वपूर्ण जितसंगै स्विजरल्याण्डले समूह ‘ए’ मा ३ अंक जोड्दै तालिकाको दोस्रो स्थानमा रहेको छ ।
लेखक
