एजेन्सी । युरोपेली फुटबलको शीर्ष प्रतियोगिता युईएफए युरोपियन फुटबल च्याम्पियनसिप (युरो कप) को क्वाटरफाइनल समिकरण पूरा भएको छ ।
बुधवार रातिबाट अन्तिम १६ का खेल खेलहरु सम्पन्न भएसंगै जर्मनीमा जारी युरो कपको क्वाटरफाइनल समिकरण पूरा भएको हो ।
जारी १७ औं संस्करणको अन्तिम ८ मा आयोजक राष्ट्र जर्मनीसंगै, साविक उपविजेता इंग्ल्याण्ड, फ्रान्स, स्पेन, पोर्चुगल नेडरल्याण्ड्स, स्विजरल्याण्ड र टर्कीए प्रवेश गरेका छन् ।
प्रि–क्वाटरफाइनलका रुपमा समेत चिनिने अन्तिम १६ को खेलबाट साविक विजेता इटालीसंगै डेनमार्क, बेल्जियम, स्लोभाकिया, स्लोभानिया, रोमानिया र जर्जिया बाहिरिएका छन् ।
अन्तिम १६ का खेलहरुमा साविक विजेता इटालीलाई स्विजरल्याण्डले २–० ले स्तब्ध पार्दा उपाधि दावेदार जर्मनीले गएको संस्करण सेमिफाइनलसम्मको यात्रा तय गरेको डेनमार्कलाई २–० ले पराजित गर्यो ।
त्यस्तै, साविक उपविजेता इंग्ल्याण्डले खेलको अन्तिम समयतिर पुनरागमन गर्दै स्लोभाकियामाथि २–१ को जित रच्दा हेभिवेट भिडन्तमा फ्रान्सले भने बेल्जियमलाई १–० ले पराजित गर्यो ।
यता, क्रिस्चियानो रोनाल्डोको कप्तानीमा रहेको पोर्चुगलले स्लोभानियालाई ट्राइब्रेकरमा ३–० ले पराजित गर्दा नेडरल्याण्ड्सले भने रोमानियामाथि ३–० को सहज जित निकाल्यो ।
त्यस्तैगरी उपाधि होडमै रहेको स्पेनले डेब्यु प्रतियोगिता खेलिरहेको जर्जियामाथि ४–१ को फराकिलो जित निकाल्दा टर्कीएले अष्ट्रियालाई २–१ ले पराजित गर्यो ।
अब क्वाटरफाइनलका खेलहरुमा बलियो राष्ट्रद्वय स्पेन र जर्मनी आमनेसामने हुनेछ भने पोर्चुगलले पनि फ्रान्ससंग खेल्ने भएको छ ।
त्यस्तै, इंग्ल्याण्डले स्विजरल्याण्डसंग खेल्ने तय हुँदा नेडरलयाण्ड्सले भने टर्कीएसंग खेल्ने तालिका रहेको छ ।
क्वाटरफाइनलका खेलहरु जुलाई ५ तारिख शुक्रवार रातिदेखि सुरु हुनेछ ।
लेखक
