एजेन्सी । पोर्चुगलले अन्तर्राष्ट्रिय मैत्रीपूर्ण खेलमा स्विडेनमाथि फराकिलो जित निकालेको छ ।
विहिवार राति भएको मैत्रीपूर्ण खेलमा क्रिस्चियानो रोनाल्डोविना मैदान उत्रिएको पोर्चुगलले स्विडेनमाथि ५–२ को फराकिलो जित निकालेको हो ।
इस्टाडियो डि. अफोन्सो हेनरिक्युज रंगशालामा भएको खेलमा पोर्चुगलको जितमा राफायल लियो, म्याथिस नुनेज, ब्रुनो फर्नान्डेज, ब्रुमा र गोन्कालो रामोसले गोल गरे ।
पराजित टोलीका लागि भने भिक्टर ग्योकेरेस र गुस्टाफ निल्सनले गोल फर्काए ।
खेल सुरु भएको २४ औं मिनेटमा लियोको गोलमार्फत् पोर्चुगलले सुरुवाती अग्रता लियो ।
त्यसपछि ३३ औं मिनेटमा बेनार्डो सिल्भाको असिस्टमा नुनेजले गोल थप्दा पोर्चुगल २–० ले अघि बढ्यो ।
यता, पहिलो हाफको अन्त्यतिर ४५ औं मिनेटमा निल्सन सेमेडोको पासमा फर्नान्डेजले गोल गर्दा पोर्चुगल पहिलो हाफसम्ममा ३–० को आरामदायी अग्रता सहित अघि बढ्यो ।
त्यस्तै, दोस्रो हाफको ५७ औं मिनेटमा फर्नान्डेजको असिस्टमा ब्रुमाले गोल गर्दा पोर्चुगलले ४–० को फराकिलो अग्रता लियो ।
लगत्तै ५८ औं मिनेटमा स्विडेनका इमिल होल्मको असिस्टमा ग्योकेरेसले गोल फर्काउँदा खेल ४–१ को अवस्थामा आयो ।
उता, ६१ औं मिनेटमा सेमेडोको पासमा रामोसले गोल गर्दा पोर्चुगल ५–१ ले अघि बढ्यो ।
खेलको अन्त्यतिर ९० औं मिनेटमा स्विडेनका निल्सनले गोल फर्काउँदा खेल ५–२ ले सकियो ।
लेखक
