एजेन्सी । मुम्बई इन्डियन्सलाई हराउँदै पञ्जाब किंग्स १८ औं संस्करणको इन्डियन प्रिमियर लिग (आईपिएल) को फाइनलमा प्रवेश गरेको छ ।
आईतवार राति भएको दोस्रो क्वालिफायर खेलमा पाँचपल्टको विजेता मुम्बई इन्डियन्सलाई ५ विकेटले हराउँदै पञ्जाब किंग्स फाइनलमा प्रवेश गरेको हो ।
योसंगै पञ्जाबले उपाधिका लागि मंगलवार राति रोयल च्यालेन्जर्स बेङ्गलुरुसंग खेल्ने तय भएको छ ।
पराजित मुम्बईको यात्रा भने क्वालिफायरबाटै टुंगिएको छ ।
भारतको गुजरातस्थित नरेन्द्र मोदी रंगशालामा भएको खेलमा २०४ रनको विजयी लक्ष्यका साथ जवाफी ब्याटिङमा आएको पञ्जाबले १९ ओभरको खेलमा ५ विकेट गुमाएर २०७ रन जोड्दै रोमाञ्चक जित रच्यो ।
पञ्जाबलाई जिताउन कप्तान श्रेयस अय्यरले कप्तानी पारी खेल्नेक्रममा ४१ बलमा ५ चौका र ८ छक्का प्रहार गर्दै सर्वाधिक ८७ रन जोडेर अविजित रहँदा नेहाल वाधेराले २९ बल खेल्दै ४ चौका र २ छक्का प्रहार गर्दै ४८ रन जोडेर पेविलियन फर्किए ।
त्यस्तै, विकेटकिपर जोश इंग्लिसले २१ बलमा ५ चौका र २ छक्का प्रहार गर्दै ३८ रन जोडेर आउट हुँदा ओपनर ब्याट्सम्यान प्रियान्स आर्याले १० बल खेल्नेक्रममा २ चौका र १ छक्का प्रहार गरेर २० रन बनाएर पेविलियन फर्किए ।
यता, अर्का ओपनर प्रभसिमरन सिंह ६ र शशांक सिंह २ रनमा पेविलियन फर्किदा मार्कुस स्टोइनिस भने २ रनमा अविजित रहे ।
पञ्जाबले अतिरिक्त रुपमा ४ रन जोड्यो ।
मुम्बईका लागि आश्वानी कुमारले २ विकेट लिँदा कप्तान हार्दिक पाण्डेया र ट्रेन्ट बोल्टले १–१ विकेट लिए ।
त्यसअघि टस हारेर पहिला ब्याटिङमा उत्रिएको मुम्बईले निर्धारित २० ओभरको खेलमा ६ विकेट गुमाएर २०३ रन जोड्यो ।
मुम्बईका लागि सुर्यकुमार यादवले २६ बलमा ४ चौका र ३ छक्का प्रहार गर्दै ४४ रन बनाएर आउट हुँदा तिलक बर्माले २९ बल खेल्नेक्रममा २ चौका र २ छक्का प्रहार गरेर ४४ रन जोडेर पेविलियन फर्किए ।
त्यस्तै, नमन धिरले १८ बलमा ७ चौका प्रहार गर्दै ३७ रन जोडेर आउट हुँदा ओपनर ब्याट्सम्यान तथा विकेटकिपर जोनी बैीस्ट्रोले २४ बल खेल्नेक्रममा ३ चौका र २ छक्का प्रहार गर्दै ३८ रन जोडेर पेविलियन फर्किए ।
यता, हार्दिक पाण्डेयाले १३ बल खेल्दै १ चौका मद्दतमा १५ रन जोडेर आउट हुँदा अर्का ओपनर रोहित शर्मा ८ रनमा पेविलियन फर्किए ।
राज बावा ८ रनमा अविजित रहँदा मिट्चेल सान्टनेर शुन्य रनमा अविजित रहे ।
मुम्बईले अतिरिक्त रुपमा ९ रन जोड्यो ।
पञ्जाबका लागि अजमतुल्लाह ओमारजायीले २ विकेट लिँदा मार्कुस स्टोइनिस, केयल जमिइसन, विजय कुमार र युजभेन्द्र चाहलले समान १–१ विकेट लिए ।
लेखक
