एजेन्सी । युएईमा जारी आईसीसी महिला टि–२० विश्वकपमा अष्ट्रेलियाले पाकिस्तानलाई सहजै हराएको छ ।
शुक्रवार राति भएको खेलमा साविक विजेता अष्ट्रेलियाले दक्षिण एसियाली राष्ट्र पाकिस्तानलाई सहजै ९ विकेटले हराएको हो ।
जितसंगै अष्ट्रेलियाले समूह चरणमा ३ खेल खेलिसक्दा शतप्रतिशत जितलाई निरन्तरता दिँदै ६ अंक जोडेर समूह ‘ए’ को शीर्ष स्थानमा उक्लिएको छ ।
पराजित पाकिस्तानको भने समान ३ खेलमा १ मा जित र २ मा हारको नतिजासहित २ अंक जोडेर समूह तालिकाको चौथौं स्थानमा उक्लिएको हो ।
दुबईस्थित दुबई अन्तर्राष्ट्रिय क्रिकेट रंगशालामा भएको खेलमा ८३ रनको सामान्य विजयी लक्ष्यका साथ जवाफी ब्याटिङमा उत्रिएको अष्ट्रेलियाले मात्र ११ ओभरमा १ विकेट गुमाएर पूरा गर्यो ।
अष्ट्रेलियाका लागि कप्तान तथा विकेटकिपर एलिसा हेलीले २३ बलमा ५ चौका प्रहार गर्दै ३७ रन जोडेर रिटायर्ड हर्ट हुँदा एलिस पेरीले २३ बल खेल्नेक्रममा २ चौका प्रहार गर्दै २२ रन जोडेर अविजित रहिन् ।
त्यस्तै, ओपनर ब्याटर बेथ मोनीले १५ बलमा ३ चौका प्रहार गर्दै १५ रन जोडेर आउट हुँदा आस्ली गार्डनर ७ रनमा अविजित रहिन् ।
अष्ट्रेलियाले अतिरिक्त रुपमा २ रन जोड्यो ।
पाकिस्तानका लागि सदिया इकबालले १ विकेट लिइन् ।
त्यसअघि टस हारेर पहिला ब्याटिङमा उत्रिएको पाकिस्तानले १९.५ ओभरमा अलआउट हुँदै ८२ रन जोड्यो ।
पाकिस्तानका लागि आलिया रियाजले ३२ बलमा ३ चौका प्रहार गरेर २६ रन जोड्दै आउट हुँदा ओपनर ब्याटर सिद्रा अमिन र इराम जाभेड समान १२–१२ रन जोडेर पेविलियन फर्किन् ।
त्यस्तै, निदा दर १०, कप्तान तथा विकेटकिपर मुनिबा अली ७ रनमा आउट हुँदा सदाफ शम्स, ओमैमा सोहिल र तुबा हस्सन समान ३–३ रनमा पेविलिय फर्किन् ।
यता, शेदा अरोब शाह १ रनमा आउट हुँदा सादिया इकबाल शुन्य रनमा अविजित रहिन् ।
पाकिस्तानले अतिरिक्त रुपमा ५ रन जोड्यो ।
पाकिस्तानलाई सस्तैमा अलआउट गर्न अष्ट्रेलियाका लागि आस्ली गार्डनरले सर्वाधिक ४ विकेट लिँदा अनाबेल सथरल्यान्ड र जर्जिया वारेह्यामले २–२, तथा मेगन स्चुट र सोफी मोलिनेउक्सले १–१ विकेट लिइन् ।
लेखक
