एजेन्सी । श्रीलंकामा जारी एसीसी महिला टि–२० एसिया कपअन्तर्गत खेलमा पाकिस्तानमाथि भारतले सहज जित निकालेको छ ।
शुत्रवार राति भएको बलिया दुई राष्ट्रबीचको खेलमा पाकिस्तानमाथि साविक विजेता भारतले ७ विकेटको सहज जित निकालेको हो ।
महत्वपूर्ण जितसंगै भारतले समूह ‘ए’ मा २ अंक जोडेको छ ।
रनगिरी दमबुल्ला अन्तर्राष्ट्रिय क्रिकेट रंगशालामा भएको खेलमा १०९ रनको सामान्य विजयी लक्ष्यका साथ जवाफी ब्याटिङमा उत्रिएको भारतले १४.१ ओभरमा मात्र ३ विकेट गुमाउँदै पूरा गर्यो ।
भारतको जितमा ओपनर ब्याटर स्मिृति मन्धानाले ३१ बलमा ९ चौका प्रहार गर्दै ४५ रन जोड्दा अर्का ओपनर शफाली बर्माले २९ बल खेल्दै ६ चौका र १ छक्का प्रहार गर्दै ४० रन जोडेर पेविलियन फर्किइन् ।
त्यस्तै, दयालान हिमालाथाले ११ बलमा ३ चौका प्रहार गर्दै १४ रन जोडेर आउट हुँदा कप्तान हर्मनप्रित कौर ५ र जेमिमाह रोड्रिगुएस ३ रनमा अविजित रहिन् ।
भारतले अतिरिक्त रुपमा २ रन जोड्यो ।
पाकिस्तानका लागि सेदा अरोब शाहले २ विकेट लिँदा नशरा सन्धुले १ विकेट लिइन् ।
त्यसअघि टस जितेर पहिला ब्याटिङमा उत्रिएको पाकिस्तानले १९.२ ओभरमा अलआउट हुँदै १०८ रन जोड्यो ।
पाकिस्तानका लागि सिद्रा अमिनले ३५ बलमा ३ चौका प्रहार गर्दै २५ रन जोड्दै आउट हुँदा तुबा हस्सनले १९ बल खेल्नेक्रममा ३ चौका प्रहार गर्दै २२ रन जोडेर पेविलियन फर्किइन् ।
त्यस्तै, फातिमा सानाले १६ बलमा १ चौका र २ छक्का प्रहार गर्दै २२ रन जोडेर अविजित रहँदा विकेटकिपर मुनिबा अलीले ११ बलमा २ चौका प्रहार गर्दै ११ रन जोडेर पेविलियन फर्किइन् ।
यता, कप्तान निदा दर ८, आलिया रियाज ६, गुल फेरोजा ५ र सेदा अरोब शाह २ रनमा पेविलियन फर्किदा अन्य ३ खेलाडीले अंकको खाता नै खोल्न सकेनन् ।
पाकिस्तानले अतिरिक्त रुपमा ७ रन जोड्यो ।
पाकिस्तानलाई सस्तैमा अलआउट गर्न भारतका लागि दिप्ती शर्माले ३ विकेट लिँदा रेनुका सिंह, पुजा भस्ट्राकर र श्रेयाङ्का पाटिलले समान २–२ विकेट लिइन् ।
लेखक
