भक्तपुर । श्रीलंकामा जारी एसीसी महिला टि–२० एसिया कपमा नेपाल पाकिस्तानसंग पराजित भएको छ ।
आईतवार राति भएको खेलमा नेपाल पाकिस्तानसंग ९ विकेटले पराजित भएको हो ।
पराजयसंगै नेपालले समूह ‘ए’ मा २ खेलमा १ मा जित र १ मा हारसहित २ अंक जोडेको छ ।
पाकिस्तानको पनि समान २ खेलमा २ अंक रहेको छ ।
तर, नेट रननेटका आधारमा पाकिस्तान तालिकाको दोस्रो स्थानमा उक्लिदा नेपाल भने तेस्रोमा झरेको छ ।
रनगिरी दमबुल्लाह अन्तर्राष्ट्रिय क्रिकेट रंगशालामा भएको खेलमा १०९ रनको सामान्य विजयी लक्ष्य पछ्याएको पाकिस्तानले ११.५ ओभरमा मात्र १ विकेट गुमाउँदै ११० रन जोड्यो ।
पाकिस्तानका लागि ओपनर ब्याटर गुल फेरोजाले ३४ बलमा १० चौका प्रहार गर्दै ५७ को अर्धशतकिय पारी खेल्दा विकेटकिपर तथा अर्का ओपनर मुनिबा अलीले ३४ बलमा ८ चौका प्रहार गर्दै ४६ रन जोडेर अविजित रहिन् ।
त्यस्तै, तुबा हस्सन १ रनमा अविजित रहिन् ।
पाकिस्तानले अतिरिक्त रुपमा ६ रन जोड्यो ।
नेपालका लागि १ मात्र विकेट कविता जोशीले लिइन् ।
त्यसअघि टस हारेर पहिला ब्याटिङमा उत्रिएको नेपालले निर्धारित २० ओभरको खेलमा ६ विकेट गुमाउँदै १०८ रन जोड्यो ।
नेपालका लागि कविता जोशीले २३ बलमा ४ चौका र १ छक्का प्रहार गर्दै ३१ रन जोडेर अविजित रहँदा सिता राणामगरले ३० बल खेल्दै ३ चौका प्रहार गरेर २६ रन जोड्दै रनआउट भइन् ।
त्यस्तै, पुजा महतोले ३२ बल खेल्दै ३ चौका प्रहार गरेर २५ रन जोड्दै रनआउट हुँदा कविता कुनुवारले १३ बलमा ३ चौका प्रहार गर्दै १३ बल जोड्दै आउट भइन् ।
यता, रुविना क्षेत्री ८ रनमा रनआउट हुँदा सम्झना खड्का ४ रन जोड्दै पेविलियन फर्किन् ।
नेपालका अन्य ब्याटरले अंकको खाता नै खोल्न सकेनन् ।
नेपालले अतिरिक्त रुपमा १ जोड्यो ।
पाकिस्तानका लागि सादिया इकबालले २ विकेट लिँदा फातिमा सानाले १ विकेट लिइन् ।
लेखक
